Thŭn 1975, leh hruê mtlaih êngiê kwar Dhŭng, hluh hlir lăn čar, Đặng Kháng ăt msĕ mơ̆ng mnuih Čăm ti ƀuôn hgŭm Bắc Bình hdĭp knang kơ bruă pưk hma, jưh knang kơ êa hlĭm hjan. Kyuanăn yơh boh mnga ƀiă, ana pla mjing amâo mâo čăt đĭ, mnơ̆ng rông kăn tŭ dưn, dŭm gŏ sang mă bruă knŏng duah mnơ̆ng ƀơ̆ng đuč, amâo mâo mĭn ôh kơ klei ba čhĭ boh mnga.

Tuôm jing lĭng kahan Awa Hô, leh wĭt hŏng klei hdĭp aguah tlam, khădah klei hdĭp tuôm hŏng lu klei dleh dlan, ƀiădah diñu jing phung nao êlâo hlăm klei mđĭ kyar bruă duh mkra gŏ sang, hur har mă bruă knuă čiăng bi hơĭt klei hdĭp.

Dưi ngă bruă hlăm êpul Lĭng kahan hđăp, hŏng klei bi kƀĭn êpul leh anăn dŭm êpul bruă, Đặng Kháng dưi hmư̆ dŭm hdră êlan mơ̆ng Đảng, knŭk kna kơ hdră êlan mđĭ kyar bruă duh mkra ala ƀuôn, boh nik dưi nao čuă lu gru hmô mơ̆ng êpul lĭng kahan hđăp kơ mđĭ kyar bruă duh mkra gŏ sang, bi đru msir lăm klei ư̆ êpa, gĭr ktưn bi mdrŏng kơ pô.

Đặng Kháng bi klă rông bê, rông êmô bi mguôp hŏng pla êbeh 1000 gơ̆ng guga čiăng mđĭ kyar klei hdĭp mda gŏ sang. Tal êlâo êjai ka mâo prăk, gŏ sang blei dŭm drei bê ana leh anăn bê knô čiăng rông ngă mječ. Leh sa wưng, kyua klei kriê dlăng jăk, bê mđai truh dŭm pluh drei, grăp thŭn gŏ sang ñu mâo giăm 100 êklăk prăk mơ̆ng čhĭ bê, êmô. Đặng Kháng brei thâo, klei hdĭp gŏ sang găn leh dŭm hruê duah êsei huă kơ grăp hruê msĕ hŏng êlâo dih.

 “Leh mtlaih êngiê, kâo nao kahan mâo 2 thŭn, truh thŭn 1976 kâo wĭt, bruă sang čư̆ êa alŭ wăl ruah kâo hlăm êpul lĭng kahan hđăp mơ̆ng thŭn 2004, wưng anăn, gŏ sang kâo tuôm hŏng lu klei dleh dlan, ƀiădah kyua nao hgŭm hlăm êpul lĭng kahan hđăp, dưi mâo čan prăk, kâo ba wĭt duh bi liê mđĭ kyar bruă duh mkra, pla ana guga, blei dŭm drei êmô, bê wĭt rông. Mơ̆ng hruê mđĭ kyar bruă mkra mjing, rông mnơ̆ng, bruă duh mkra gŏ sang ăt hơĭt hĭn.”

Đặng Kháng mñă klă, ñu leh gŏ sang mâo msĕ hruê anei jing klei gĭr mơ̆ng gŏ sang, ƀiădah ăt mâo wăt dŭm hdră êlan mơ̆ng Đảng leh anăn knŭk kna leh anăn jing klei đru, klei mtô mơ̆ng êpul bruă lĭng kahan hđăp.

Nguyễn Bảo Quốc, Khua êpul hgŭm lĭng kahan hđăp ƀuôn hgŭm Bắc Bình, čar Gia Lai brei thâo brei thâo, leh bi mŭt mbĭt, êpul bruă mâo lu hĭn mnuih ƀuôn sang dŭm djuê ana mnuih djuê ƀiă bi hdĭp mda. Êngao kơ klei uêñ mĭn mơ̆ng êpul lĭng kahan hđăp čar, mbĭt hŏng dŭm hdră êlan mơ̆ng Đảng, knŭk kna, hŏng dŭm hdră bruă duh mkra lĭng kahan hđăp, phung lĭng kahan hđăp ƀuôn hgŭm Bắc Nình găn klei dleh dlan čiăng kơ gŏ sang mâo klei hdĭp trei mđao.

 “Đặng Kháng mơ̆ng sa gŏ sang dleh dlan, leh nao hgŭm hlăm êpul lĭng kahan hđăp dưi bi lar knuih hdĭp lĭng kahan Awa Hồ, kyua mâo klei uêñ mĭn mơ̆ng Đảng, knŭk kna dưi lĭng čan mơ̆ng knơ̆ng prăk đra ba ala ƀuôn leh anăn knơ̆ng prăk bruă lŏ hma leh anăn mđĭ kyar krĭng ƀuôn sang, kyua mâo dŭm ênoh anăn ñu dưi mđĭ kyar klei hdĭp mda gŏ sang, plah êbeh 1.000 gơ̆ng guga, rông êmô, bê čiăng jing gŏ sang đĭ kyar hlăm alŭ wăl.”

Amâo djŏ knŏng bi ktưn kơ pô, ƀiădah lĭng kahan hđăp Đặng Kháng lŏ mtrŭt mjhar, mtô kơ mnuih ƀuôn sang mă bruă knuă ti krĭng ƀuôn sang pô, amâo mâo čang guôn klei đru mơ̆ng knŭk kna. Klei gĭr mơ̆ng lĭng kahan hđăp Đặng KHánh dưi bi klă ai tiê kơ klei čŏng pô, klei gĭr ktưn mơ̆ng lĭng kahan awa Hồ.