Ƀuôn hgŭm Ngũ Lạc êlâo dih ti kriêk Duyên Hải, čar Trà Vinh hđăp, mnuih Khmer mâo 86%, tuôm jing krĭng msăt ƀun, kyua lăn trô̆ msĭn, êlan klông klah hjăn. Klei hdĭp mnuih ƀuôn sang lu klei dleh dlan. Ƀiădah, kyua mâo hdră ala čar kñam mđĭ kyar bruă duh mkra alâ ƀuôn krĭng mnuih djuê ƀiă, krĭng čư̆ čhiăng, ƀuôn hgŭm mkŏ mjing klei găl kơ êbeh 3.200 gŏ sang lĭng čan mđĭ myar bruă mkra mjing, bi mlih bruă mă hŏng ênoh prăk êbeh 118 êklai prăk.

Thŭn 2021, ayŏng Thạch Bỡ dưi čan 20 êklăk prăk čiăng blei êmô mjeh. Amâo djŏ knŏng dưi lĭng čan, ñu lŏ dưi nao hgŭm hlăm adŭ hriăm rông mnơ̆ng. Kyuanăn, êmô đĭ hriê jăk, ba wĭt hnư prăk hơĭt. Truh thŭn 2023, ñu mâo knŭk kna đru thiăm 50 êklăk prăk čiăng rŭ mdơ̆ng sang bi mguôp. Mbĭt hŏng prăk čhĭ êmô leh anăn klei đru mơ̆ng găp djuê, ñu dưi mdơ̆ng sang mâo ênoh 150 êklăk prăk. Ayŏng Thạch Bỡ brei thâo: “Rông êmô mjeh msĕ hŏng kâo msĕ pioh prăk ŭn hruh. Êngao kơ rông êmô, sang ăt mâo lŏ điêt, mmông wăn nao mtô boh hră Khmer kơ phung hđeh. Mâo alŭ wăl ksiêm ƀuh pô mâo klei gĭr kyuanăn mâo klei đru 50 êklăk prăk, Phung ayŏng adei ăt đru ƀiă, kyuanăn dưi mdơ̆ng sang dôk.”

Ƀuôn hgŭm Long Hiệp hlăm kdriêk Trà Cú, čar Trà Vinh hđăp, leh bi mŭt mbĭt ăt mâo mnuih Khmer êbeh 80%. Hlăm wưng thŭn 2021 – 2025, ƀuôn hgŭm mâo gưl dlông đru êbeh 540 êklai prăk čiăng mkra êlan klông, sang hră leh anăn đru kơ gŏ sang ƀun mđĭ kyar bruă mkra mjing. Kyuanăn, hnơ̆ng gŏ êsei ƀun hrŏ adôk ti gŭ 2%. Amai Thạch Thị Sa Rin – sa gŏ sang ƀun hưn kơ hdră tlaih ƀun mơ̆ng gŏ sang. Êlâo dih, ñu dôk hlăm sang điêt, amâo mâo prăk kăk,  knŏng han pông êdeh, nao mă bruă mưn. Kyua mâo knŭk kna đru êmô mjeh leh anăn čhĭ mnia điêt, klei hdĭp gŏ sang ƀrư̆ ƀrư̆ mâo klei hơĭt. “Hlăk dôk điêt gŏ sang ƀun sơnăk, knŏng ngă bruă han pô êdeh, nao wiă mdiê, mmông mâo mông hơăi. Êdei anei mâo knŭk kna brei êmô leh anăn brei čan čiăng čhĭ mnia, kyuanăn mâo prăk hrui wĭt hơĭt, mâo prăk mdơ̆ng sang.”

Amâo djŏ knŏng brei čan prăk, dŭm alŭ wăl lŏ pŏk adŭ hriăm, jao hdră mnêč, boh nik kñăm mđĭ klei thâo săng čiăng kơ mnuih ƀuôn sang čŏng pô kpưn đĭ. Thạch Viên, sa gŏ sang leh tlaih ƀun mñă klă, klei đru mơ̆ng knŭk kna jing boh kdrŭt, ƀiădah asei pô ăt mâo klei gĭr čiăng dưi tlaih ƀun hơĭt kjăp. Thạch Viên, brei thâo: “Êjai mâo klei đru mơ̆ng knŭk kna pô mâo boh kdrŭt čiăng kpưn đĭ. Êlâo dih pô dôk hlăm sang tĭ ƀrôč, ară anei mâo sang mrâo ăt jhŏng kpưn đĭ hlăm klei hdĭp. Biădah čiăng tlaih ƀun, pô srăng mâo klei gĭr, knŭk kna knŏng đru kơ pô đuč.”

Thŭn 2025, čar Vĩnh Long nga hdră ala čar kñăm mđĭ kyar bruă duh mkra, ala ƀuôn krĭng mnuih djuê ƀiă, hŏng ênoh prăk êbeh 284 êklai prăk, đru mguôp bi hrŏ hnơ̆ng gŏ êsei ƀun hlăm krĭng mnuih Khmer hlăm čar adôk 1,6%. Thạch Mu Ni – k’iăng khua knơ̆ng bruă djuê ana leh anăn klei đăo čar Vĩnh Long brei thâo, hlăm wưng thŭn 2025 – 2030, čar srăng lŏ duh bi liê mâo mta kñăm kơ gŏ sang ƀun, giăm ƀun leh anăn gŏ sang mrâo tlaih ƀun.Dŭm thŭn giăm anei ti krĭng mnuih Khmer dưi hluê ngă mbĭt 03 hdră ala čar kñăm, hluê anăn krĭng mnuih djuê ƀiă mâo dŭm klei mlih jăk. Hluê si hmei ksiêm dlăng, lu gŏ sang ƀun ară anei jing phung hjăn păn, phung ruă duam. Tal dua jing gŏ sang kƀah prăk ngă bruă, leh anăn đa đa phung amâo čiăng mă bruă knuă. Čiăng bi hrŏ gŏ sang ƀun, tal 1 jing đru kơ gŏ sang ƀun, giăm ƀun hŏng dŭm hdră duh ƀơ̆ng klă klơ̆ng. Yuôm hĭn jing hâo hưn, mtrŭt mjhar mnuih ƀuôn sang čŏng pô duh ƀơ̆ng, čiăng kpưn đĭ, mkŏ mjing klei hdĭp.”

Dŭm boh sang mrâo, dŭm bĭt êlan bêtông kpă blua leh anăn klei hơ̆k mơak ti dŭm phum, sóc Khmer ti Vĩnh Long hruê anei jing boh tŭ dưn klă klơ̆ng mơ̆ng hdră êlan găl guôp, djŏ ai mnuih ƀuôn sang, pŏk êlan êdei anăp trei mđao hĭn.