Adiê ang dar ti ƀuôn Tuor, amâo lŏ hmư̆ ôh ênai êdeh ruăt kuăt ktuê êlan dơ̆ng prŏng mrô 14, êlan bêtông mŭt hlăm ƀuôn găn dŭm boh sang, đang boh kroh mtah mda, ana kphê, durian, mnga mñĭ, hrah jŭ hlăm mnư̆ mnang dua nah êlan. “Sang Kathy” jăk siam hŏng êa mil kyâo, boh êñan mưng ƀuh hŏng wăl tač bŏ hŏng mnga jăk siam. Mnâo ƀâo mngưi mơ̆ng sang pui knư̆ jăk siam hĭn ƀĭng drei ah:

Bi leh thŭn 2023, 2 thŭn êgao, kah knar grăp thŭn “Sang Kathy” drông hlăm brô 200 gưl čô tue, 80% hlăm anăn jing tue ala tač êngao, lu hĭn hriê mơ̆ng Prăng, Mi, Ăngle, Sweden… Boh sang ba klei jăk siam kơ phung tue amâo djŏ knŏng kyua klei mkra mjing sang krum dlông djuê ana, klei jăk siam, khuăt, sĭt êmĭt mơ̆ng pô sang ôh, ƀiădah lŏ mâo wăl anôk jăk kma dhar kreh êpul êya anak Êđê. “Sang Kathy” jing klei yăl dliê mkŏ klei khăp sa čô ƀĭng găp mnuih Prăng hŏng anak mniê Kathy mơ̆ng ung mô̆ amai H  Belly čiăng pioh nanao hlăm ai tiê : “Maison de Kathy mphŭn mâo mơ̆ng sa klei yăl dliê mgei ai tiê snăk. Ami rông kâo mnuih Prăng, anăn ñu Claude, khăp snăk kơ anak mniê kâo, ĕ Ka Thy wăt tơdah amâo myun ôh, amâo suaih pral ôh. Ñu lač kơ kâo mkŏ mjing homestay mâo anăn Kathy čiăng kriê pioh klei khăp ñu hŏng anak mniê kâo, mbĭt anăn hưn mthâo dhar kreh djuê ana mơ̆ng êpul êya pô hŏng phung tuê hlăm ala čar leh anăn ala tač êngao. Hŏng klei čang hmăng dua ung mô̆, “Sang Kathy” dưi ngă leh, jing anôk hưn mthâo klei jăk siam dhar djuê anak Êđê.”

 Phung tue weh čhưn leh anăn dôk jưh ti homestay "Sang Kathy” srăng dưi čhưn dlăng klei hdĭp mda mnuih ƀuôn sang Êđê tinei mtam, hrăm mbĭt tŭk knă, nao pưk hma, pơ̆k mñam, mnăm kpiê čeh ti djiêô kpur pui… Amai Belly hơ̆k mơak yăl dliê kơ klei mkŏ mjing dŭm tour hiu čhưn dlăng klei hdĭp mda mnuih Êđê tinei kyua ñu pô čih mkra čiăng hưn mthâo kơ phung tue hiu čhưn…

Phung tuê hơ̆k êdi êjai đĭ dlông êdeh kai nao ktuê dlăng ƀuôn sang, dlăng kơ kdrăp pĕ tông djuê ana msĕ si čĭng čhar, čing kram, kdrăp čŭt hơô djuê ana leh anăn kdŏ čhuang. Hmei mă bruă leh anăn mâo phung tuê tla prăk, mâo prăk hrui wĭt kơ mnuih ƀuôn sang yua hlăm klei hdĭp. Kâo ktưn hưn kyua amâo djŏ knŏng mâo hnư hrui wĭt ƀiă dah lŏ kriê pioh leh anăn bi lar dhar kreh djuê ana.

Sa čô tuê mơ̆ng Indonesia nao čuă ƀuôn Tuôr leh anăn homstay mơ̆ng amai Belly bi êdah klei hơ̆k mơak: Ơ, anei jing gưl tal êlâo kâo hriê ti Việt Nam, kâo ƀuh klei jăk amâo djŏ knŏng yan adiê, ƀiădah jing hŏng klei mnuih ƀuôn sang tinei hdĭp djŏ guôp hŏng ñu. Ai hdĭp êđăp ênang leh anăn jăk siam hĭn. Dŭm mta mnơ̆ng ƀơ̆ng ka tuôm ƀuh, hưn mdah kơ mnuih Êđê, truh kơ sa mmông pĕ tông kdrăp djuê ana, dlăng jăk êdi.

Phung tuê ăt ba lu klei mrâo kơ amai Belly leh anăn mnuih ƀuôn sang hlăm ƀuôn. Anăn jing klei yăl dliê mjuăt phung hđeh đuĕ kbưi mơ̆ng đĭng blŭ mơ̆ng sa čô amĭ mnuih Prăng, jing klei blŭ hrăm grăp hruê mơ̆ng sa čô tuê Angle…Thâo raih klei prăng, Amai Belly lŏ hriăm thiăm lu klei blŭ mkăn, mơ̆ng klei Angle, Anglei Amarik, klei Sweden čiăng dưi ngă tour hluê si klei tuê čiăng, kah mbha lu hĭn hŏng phung tuê kơ dhar kreh yang ƀuôn. Dŭm klei anăn msĕ si čiăng drông phung tuê wĭt kơ sang, wĭt hŏng ƀuôn sang bŏ hŏng ai hdĭp. Hŏng êpul êya pô, amai H’Belly lŏ mtrŭt mjhar mnuih ƀuôn sang bi mguôp hŏng bruă mă đưm, čiăng hưn mdah hŏng phung tuê: Kâo mtrŭt mjhar mnuih ƀuôn sang pơ̆k mñam, knă kpiê čeh, tông čĭng čhar. Kâo srăng jing pô hrui blei jih jang dŭm mnơ̆ng anăn čiăng lŏ čhĭ kơ phung tuê. Êjai mâo lu tuê, kâo mbĭt hŏng mnuih ƀuôn sang tŭ drông. Bruă ƀuh phung tuê mơ̆ng Prăng, Mi hriê čuă mđĭ ai mnuih ƀuôn sang hlăm ƀuôn lu êdi. Êjai ƀuh phung tuê ala tač êngao mơ̆ng Prăng, dŭm ala čar Ơrôp hriê, blei mnơ̆ng pơ̆k mñam, djam mtam, mnơ̆ng djă pioh, mnuih ƀuôn sang ƀuh klei kâo lač jing sĭt. Mơ̆ng anăn mnuih ƀuôn sang thâo săng pô yơh jing phung kăp hưn kơ dhar kreh.

Dŭm êpul tuê ƀrư̆ hruê ƀrư̆ lu, ba mbĭt hŏng klei čiăng ksiêm hriăm leh anăn mpŭ kơ knhuah gru dhar kreh, bi êrâo klei ktưn hưn mơ̆ng mnuih Êđê ƀuôn Tuôr. Mbĭt hŏng dŭm sang krum dưi mkra mđĭ ba yua hlăm bruă hiu čhưn ênguê; grăp mlam lŏ lu hĭn klei tông čing, mbĭt hŏng klei blŭ tlao hơ̆k mơak mơ̆ng phung tuê leh anăn mnuih ƀuôn sang. H’Drian Niê, 80 thŭn hơ̆k mơak ti anăp dŭm klei mlih mơ̆ng ƀuôn, brei thâo: “Kâo hơ̆k mơak êdi êjai ƀuh lu phung tuê, wăt hlăm lăn čar leh anăn êngao lăn čar hriê ti ƀuôn Tuôr. Diñu amâo djŏ knŏng khăp kơ wăl siam êđăp ênang ƀiădah lŏ khăp kơ dŭm mta mnơ̆ng ƀơ̆ng knhuah gru leh anăn djam doh pĕ mơ̆ng war sang, mơ̆ng hma. Čiăng kơ ƀuôn Tuôr ƀrư̆ hruê ƀrư̆ đĭ kyar leh anăn iêo jak lu hĭn phung tuê, klei blŭ hrăm hŏng klei Angle, klei Prăng jing yuôm bhăn êdi. Kâo hmăng hmưi phung mda asei srăng hur har blŭ klei ala tač êngao. Kyua klei anăn yơh srăng đru kơ drei mkŏ jăk hĭn hŏng phung tuê ala tač êngao, ba ƀuôn Tuôr jing sa anôk truh mdrŏng siam leh anăn mrâo mrang hĭn.”

Dŭm boh sang dlông drông tuê, dŭm mta mnơ̆ng ƀơ̆ng knhuah gru jing mnơ̆ng jăk yâo, ênai čing kwang ti krah klei hdĭp aguah tlam… klă sĭt amâo lŏ jing klei đưm ôh ƀiădah jing klei jĕ giăm hlăm klei hdĭp mda bŏ hŏng klei hmăng hmưi bi lar boh tŭ yuôm knhuah gru hlăm grăp ai tiê mơ̆ng mnuih Êđê.