VOV4.Êđê - Ară anei, mnuih pla boh durian ti kdriêk Krông Pač, čar Dak Lak mŭt leh hlăm yan hrui êmiêt phŭn. Boh durian djŏ boh mnga ƀiădah ênoh čhĭ trŭn êdi, ngă kơ mnuih pla boh durian ênguôt dhuôt. Pô čih klei mrâo kơ Sang mđung asăp blŭ Việt Nam ti Lăn dap kngư nao leh ti Êa Yông – să pla lu êdi boh durian mjeh Dona mơ̆ng čar Dak Lak lehanăn mâo klei čih lač:

Tạ Văn Châm, k’iăng khua bruă sang čư̆ êa să Ea Yông brei thâo: hlăm să mâo 2.000 ha pla mjing ana durian, hlăm anăn mâo 1.000 ha dôk hlăk mboh lehanăn dôk hrui pĕ. Hnơ̆ng boh mnga thŭn anei mĭn tĭng mâo êbeh 20 êbâo tôn, jing krah wah hnơ̆ng boh durian hlăm kdriêk. Êlâo dih boh durian mjeh Dona mâo ênoh truh kơ 80 êbâo prăk/kg, thŭn dih ăt mâo 40 truh kơ 45 êbâo prăk/kg. Thŭn anei ti akŏ yan hrui pĕ, boh durian mjeh Ri6 ăt dưi čhĭ hŏng ênoh 30 êbâo prăk. Ară anei boh durian Dona khua lu leh ƀiădah phung ghan mnia amâo đei blei ôh. Mâo đa đa gŏ sang kruăk leh ênoh êbeh 40 êbâo, ƀiădah ară anei lŏ trŭn knŏng 25 êbâo, mâo anôk lŏ kơ gŭ hĭn keh dưi ba čhĭ. “Ară anei boh durian kcư̆m mŭt hlăm yan hrui pĕ leh ƀiădah kyua klei ruă tưp Covid-19, anôk ba čhĭ boh durian mơ̆ng mnuih ƀuôn sang să Ea Yông dleh dlan êdi kyua amâo dưi ba čhĭ kơ ala tač êngao ôh. Phung ghan mnia kăn blei lei, amâodah blei knŏng ƀiă. Ênoh ară anei knŏng mâo mă mơ̆ng 18 truh kơ 25 êbâo tui si boh siam amâo dah jhat mơh.”

Tui si klei tĭng mkă mơ̆ng Y - Ngăk Niê, khua êpul mnuih ngă bruă lŏ hma să Ea Yông, hlăm yan hrui pĕ anei, mnuih ngă bruă lŏ hma hlăm să luič leh êbeh 400 êklai prăl, kyua ênoh čhĭ boh durian Dona knŏng mâo mă mkrah wah mkă hŏng thŭn êlâo. “Boh durian mơ̆ng mnuih ƀuôn sang ară anei khua leh, ksă lehanăn luh leh, ênoh čhĭ hrŏ nanao. Truh kơ ară anei knŏng dôk mă mơ̆ng 20 truh kơ 25 êbâo prăk /kg.”

Hmei nao truh đang boh mơ̆ng Y- Suông Niê ti ƀuôn Jŭng. Ti nei mâo êbeh 10 čô dôk hrui pĕ boh durian, dưm hlăm êdeh kai mdiăng ba kơ anôk mnia mblei. Y Suông brei thâo gŏ sang ñu ba chĭ leh 7 tôn, knŏng hruê anei mâo leh 2 tôn. Ênoh čhĭ boh durian hlăm đang mbha jing tlâo mta, ƀiă êdi jing 18 êbâo, 22 êbâo lehanăn 25 êbâo.

Hmei nao truh ti knơ̆ng bruă mnia mblei Dũng Thái Sơn ti alŭ 14 să Ea Kêñ. Anei jing knơ̆ng bruă hrui blei boh durian prŏng hĭn ti kdriêk Krông Pač. Lê Viết Chiến, k’iăng khua kiă kriê knơ̆ng bruă lač: Kyua mrâo anei knơ̆ng bruă duh bi liê rŭ mdơ̆ng thiăm sang hjiê bi êăt, kyuanăn grăp hruê dưi mkra mjing 20 tôn mnơ̆ng dhơ̆ng. Knơ̆ng bruă dôk gĭr hrui blei boh mnga kơ mnuih ƀuôn sang. Ƀiădah kyua klei ruă tưp Covid-19, bruă dŭ mdiăng, ba čhĭ mâo lu klei dleh dlan. Lê Viết Chiến brei thâo, ară anei knơ̆ng bruă ka dưi ba chĭ msĕ hŏng grăp thŭn, mnơ̆ng dhơ̆ng lu hĭn jing ba truh kơ ƀuôn prŏng Hồ Chí Minh lehanăn dŭm čar krĭng yŭ dhŭng, kyuanăn klei hrui blei ăt hrŏ mơh, knŏng mâo hlăm brô 7.500 tôn, knar hŏng krah wah thŭn dih “Mĭn tĭng knơ̆ng bruă čiăng hiu blei mkra mjing 15.000 tôn boh, ƀiădah kyua klei ruă tưp, bruă mnia mblei êmưt, dŭ mdiăng êmưt, lŏ thiăm amâo jăk mâo prăk kăk. Kyuanăn dưi ngă mă knŏng 50% hdră kčah êlâo anăn.”