VOV4.Êđê - Blŭ hrăm hŏng anôk bruă klei mrâo, Khua phŭn bruă Ngăn prăk Hồ Đức Phớc brei thâo: Dôk ksiêm dlăng, đru kčĕ hŏng dŭm gưl mâo klei dưi kơ hdră đru, mtrŭt mđĭ bruă duh mkra. Hlăm anăn, ksiêm dlăng hdră bruă 10 êbâo – 20 êbâo êklai prăk đru kơ anôk bruă duh mkra. Hluê si Khua phŭn bruă Hồ Đức Phớc, hlăm wưng ară anei, čiăng ba mtrŭn hdră đru, brei tŭ ư kơ hdră bi liê ngăn prăk knŭk kna đĭ mơh. Khă snăn, hlăk hdră duh mkra dôk đĭ kyar h’ĭt kjăp, srăng bi hrŏ ênoh bi liê ngăn prăk knŭk kna. Êlâo anăn, Khua Dhar bruă Ngăn prăk mơ̆ng anôk bruă kƀĭn ala Nguyễn Phú Cường brei thâo, Knŭk kna dôk čih mkra hdră kčah kluôm kơ hdră lŏ krŭ wĭt bruă duh mkra, hŏng dŭm ênoh đru kơ hdră duh mkra anăp hưn mdah kơ Anôk bruă kƀĭn ala. Hluê si Nguyễn Phú Cường, dŭm hdră đru bruă duh mkra mâo Knŭk kna čih mkra brei kluôm ênŭm kñăm pral lŏ krŭ wĭt bruă duh mkra, pŏk hdră hluê ngă djŏ hŏng boh klei ară anei mbĭt anăn mjing klei jăk găl kơ anôk bruă duh mkra./.

H Nêč pô mblang