VOV4.Êđê - Aguah hruê 20/10, ti ƀuôn prŏng Đà Lạt, êpul bi ala anôk bruă kƀĭn ala čar Lâm Đồng nao leh ti anôk mphŭn pŏk klei bi kƀĭn tal 2, anôk bruă kƀĭn ala gưl XV hŏng hdră online. Mbĭt hŏng bruă dôk mâo hlăm kluôm ala, phung bi ala čar Lâm Đồng mprăp hưn mthâo leh klei blŭ, klei akâo čiăng mơ̆ng mnuih ƀuôn sang hlăm čar kơ dŭm klei bluh mâo, klei dleh kpăk čiăng kơ anôk bruă kƀĭn ala, knŭk kna mđing dlăng, bi trông kơ hdră msir kñăm ƀư̆ mkra lehanăn msir mghaih hlăm wưng ti anăp.

Nguyễn Tạo, K’iăng khua êpul bi ala anôk bruă kƀĭn ala čar Lâm Đồng brei thâo, klei ruă Covid 19 hmăi leh kjham truh kơ 2 hdră duh mkra phŭn mơ̆ng čar jing bruă lŏ hma lehanăn bruă hiu čhưn ênguê. Hlăm anăn, bruă lŏ krŭ wĭt hdră duh mkra pla mjing, bi h’ĭt anôk hrui blei dŭm mta mnơ̆ng lŏ hma, boh nik djam mtam – mnga dôk mâo anôk bruă lŏ hma alŭ wăl ƀrư̆ msir mghaih, mkŏ mjing hdră pla mjing, lŏ mkŏ dăp hdră ngă bruă djŏ guôp, mkăp kơ klei čiăng hlăm wăl anôk blei mnia hlăm boh klei mrâo./.

H Nêč pô mblang