VOV4.Êđê - Khădah bruă đăo knăl, gang mkhư̆, bi mdrơ̆ng hŏng klei yan adiê ngă ti čar Lâm Đồng mâo nanao klei mđĭ, ƀiădah dŭm klei hmăi kyua yan adiê truh kơ ară anei ăt jing lu êdi. Mơ̆ng akŏ yan hjan truh kơ ară anei, čar Lâm Đông mâo 20 gưl adiê hjan prŏng leh anăn hjan pliêr, 12 blư̆ angĭn đrŭng, 2 klei dlưh lăn leh anăn 5 klei grăm đah ngă kơ 2 čô djiê leh anăn 2 čô êka. Klei truh yan adiê ăt ngă kơ êbeh 1.300 ha ana kyâo boh kroh jhat rai leh anăn luič mang, 1,2 ha kan hdang êa đung mang, 379 boh sang hŏng 20 ha sang ală kĭng, sang kwăt leh anăn 2 anôk bruă jhat rai hŏng kluôm ênoh hlăm brô 53 êklai prăk. Tui si Nguyễn Hà Lộc, khua kiă kriê anôk bruă knơ̆ng mkăp êa, sa čô hlăm êpul gang mkhư̆ klei truh yan adiê leh anăn tui duah phung mâo klei truh čar Lâm Đồng, khădah 68 anôk mkă hnơ̆ng hjan mâo leh klei ngă bruă tŭ dưn, biădah kyua yan adiê dleh dưi ksiêm dlăng, kyuanăn klei hmăi amâo jăk ti čar Lâm Đồng dok lu êdi. Čiăng bi hrŏ jih hnơ̆ng klei hmăi amâo jăk kyua yan adiê, čar Lâm Đồng dôk ngă dŭm hdră êlan rơ̆ng klei êđăp ênang dŭm ênao êa, knơ̆ng mkăp êa.

Y Ƀel pô mblang