VOV4.Êđê - Aguah mbruê, čar Lâm Đồng lŏ mâo thiăm 30 mâo klei ruă tưp Covid-19, hlăm anăn mâo 25 čô djŏ tuôm hŏng êpul mnuih ruă ti ƀuôn mnga Vạn Thành, ƀuôn hgŭm 5, ƀuôn prŏng Đà Lạt. Ară anei, êpul gĭt gai bruă gang mkhư̆ klei ruă tưp čar Lâm Đồng dôk gĭt gai kơ anôk bruă ksiêm dlăng klei ruă tưp čar Lâm Đồng leh anăn dŭm anôk bruă djŏ tuôm ngă bruă ksiêm duah, tui duah, kwang dar, bi ktlah, mă mta ksiêm mkă kman kơ phung djŏ tuôm.

Êngao kơ êpul êya mâo klei ruă tưp ti ƀuôn mnga Vạn Hoa, knơ̆ng bruă mdrao mgŭn čar Lâm Đồng lŏ čih yap mâo 5 čô mâo klei ruă tưp Covid-19 mrâo, hlăm anăn 2 čô jing ung mô̆ mgăt êdeh mdiăng mnơ̆ng dhơ̆ng hlăm čar, 2 čô mkăn mrâo wĭt mơ̆ng ƀuôn prŏng Hồ Chí Minh leh anăn sa čô mrâo wĭt mơ̆ng čar Bình Dương. Sơnăn, yap truh kơ aguah mbruê, čar Lâm Đồng mâo 322 čô mnuih ruă, hlăm ană mâo 264 čô mnuih ruă dưi mdrao hlao. Ară anei čar Lâm Đồng dôk ngă klei bi ktlah kơ 5.921 čô, hlăm anăn dôk bi ktlah bruă mdao mgŭn 95 čô, 3.180 dôk bi ktlah mbĭt leh anăn 2.646 čô dôk bi ktlah ti sang.

Y Bel pô mblang