VOV4.Êđê -  Hrue mbrue (8/11), Lâm Đồng lŏ dơ̆ng mâo lu mnuih djŏ klei ruă tưp Covid 19 hlăm 7 kdriêk, ƀuôn prŏng hlăm čar. Bruă sang čư̆ êa alŭ wăl mdei êjai jih jang bruă kñăm čiăng mdrơ̆ng hŏng klei ruă tưp. Hlăm ênoh 20 čô mnuih djŏ klei ruă tưp mrâo ti Lâm Đồng, lu jing phung mtưp mơ̆ng ƀuôn prŏng Hồ Chí Minh, Bình Dương, lehanăn Long An. Hlăm anăn, mâo 8 čô mâo tưp hlăm yang ƀuôn, sa čô jing mniê nga bruă đru mgăt êdeh, ba jao mnơ̆ng kơ lu anôk hlăm čar.

Ară anei êpul bruă djŏ tuôm čar Lâm Đồng hlăk dôk tui duah, ksiêm dlăng jih jang phung djŏ tuôm hŏng phung mrâo djŏ anăn. Mbĭt hŏng anăn, Lâm Đồng ăt ksiêm dlăng tui duah phung djŏ tuôm hŏng 52 êpul bi mtưp mdê mdê, lu jing ti ƀuôn prŏng Đà Lạt, Đức Trọng, Di Linh lehanăn ƀuôn prŏng Bảo Lộc. Tĭng hlăm 3 hrue kăm êgao, Lâm Đồng mâo leh 305 čô djŏ kman klei ruă tưp, mđĭ ênoh mnuih mâo klei ruă tưp covid 19 truh 708 čô mnuih. Ti anăp klei dleh dưi ksiêm dlăng mơ̆ng klei ruă tưp, čar Lâm Đồng bi klă leh mdei êjai jih jang bruă kñăm pioh kơ bruă mdrơ̆ng hŏng klei ruă tưp. Hlăm ênoh tưp anăn mâo 3 čô djiê, lehanăn 454 čô mdrao hlao leh dưi kbiă mơ̆ng sang êa drao./.

Y Khem pô mblang