VOV4.Êđê- Aguah hruê 11/10, čar Lâm Đồng bi hgŭm hŏng anôk bruă djŏ tuôm mơ̆ng čar Bình Dương, Đồng Nai, Bà Rịa - Vũng Tàu mkŏ mjing leh hdră drông êbeh 1 êbâo čô mnuih wĭt kơ ƀuôn sang. Ti ktuê êlan wĭt, êpul mâo leh dŭm anôk bruă djŏ tuôm đru msĕ si: Êpul kahan ksiêm êlan klông atăt êlan, đru mơ̆ng êpul mdrao mgŭn tơdah čiăng. Mnuih wĭt kơ ƀuôn sang brei mâo hră bi mklă amâo djŏ kman klei ruă dôk mâo klei tŭ ba yua lehanăn tơdah wĭt truh ti alŭ wăl brei hluê ngă kjăp hdră bi ktlah.

Anei jing gưl drông mnuih ƀuôn sang tal 2 mơ̆ng Lâm Đồng hlăm wang 3 hruê êgao. Êlâo anăn, Lâm Đồng drông leh êbeh 2 êbâo čô dôk kpăk đuôm ti ƀuôn prŏng Hồ Chí Minh wĭt kơ ƀuôn sang êđăp ênang. Tĭng hlăm dŭm hruê ti anăp; lu čar, ƀuôn prŏng hlăm kluôm ala lŏ dơ̆ng bi hgŭm hŏng ƀuôn prŏng Hồ Chí Minh lehanăn dŭm čar riêng gah msĕ si: Bình Dương, Đồng Nai, Bà Rịa – Vũng Tàu… mkŏ mjing hdră tŭ drông mnuih ƀuôn sang hŏng lu hdră msĕ si êlan jơ̆ng, êlan êdeh treng lehanăn êlan phiơr./.

Pô mblang: H’Nêč Êñuôl