VOV4.Êđê- Jing alŭ wăl bi knông hŏng ƀuôn prŏng Đà Lạt, anôk mâo ênoh mnuih ruă Covid-19 lu hĭn ti čar Lâm Đồng, ƀiădah kyua mđĭ lar ai tiê bi hgŭm hlăm hdră gang mkhư̆ klei ruă tưp, kdriêk Lạc Dương ăt jing krĭng mtah – krĭng ka mâo ôh mnuih ruă Covid-19. Čiăng lŏ dơ̆ng mđĭ lar klei tŭ anei, mnuih ƀuôn sang ti dŭm ƀuôn êlan tinei dôk mkŏ mjing dŭm êpul čŏng kriê dlăng răng mgang krĭng ka mâo mnuih ruă, dăp phung gak răng jih hruê mlam čiăng thâo bruă mŭt kbiă hlăm krĭng ƀuôn sang.

Hruê mmông êgao, khă adiê mđiă ktang amâodah hjan hlĭm, êbeh 10 čô mnuih mơ̆ng êpul čŏng răng mgang anôk mtah mơ̆ng alŭ 1, să Dă Sar, kdriêk Lạc Dương, čar Lâm Đồng ăt dôk ngă nanao bruă lehanăn ngă jăk bruă klam gang mkhư̆ klei ruă tưp Covid-19 mơ̆ng pô. Tĭng kang êlan Pêtông mŭt hlăm alŭ mâo nanao mnuih dôk găk răng mơ̆ng yang hruê truh kơ mmăt mlan čiăng ksiêm dlăng mnuih mŭt kbiă, boh nik jing dŭm boh êdeh lehanăn mnuih mơ̆ng anôk mkăn hriê ti nei. Păng Ting Doanh, khua kiă kriê êpul čŏng gak răng brei thâo, khădah bruă ngă jing suăi, ƀiădah jing jang hlăm êpul ăt dăp hruê mmông, bi mbha mmông gak rang, rơ̆ng kjăp bruă răng mgang anôk mtah - anôk êđăp ênang amâo mâo klei ruă tưp Covid-19 kơ ƀuôn sang.

“Tơdah mâo mnuih anôk mkăn hriê, hmei čih klă mrô êdeh, anăn ñu lehanăn ti anôk ñu dôk. Bi kơ bruă hiu ksiêm dlăng hmei ngă leh mơ̆ng êlâo, mnuih ƀuôn sang ti nei ngă jăk bruă hưn mthâo klei suaih pral, 5 mta klei mtă, anăn jing klei mơak êdi, mdul ƀiă klei suăi kơ êpul ngă bruă gang mkhư̆ klei ruă tưp Covid-19. Kâo hmăng hmưi dưi rơ̆ng kjăp lehanăn bi lar klei bi hmô anei čiăng ngă jăk bruă gang mkhư̆ klei ruă tưp mâo klei êđăp ênang, sa čô kyua lu mnuih.”

Êdeh êdâo leh anăn mnuih mơ̆ng alŭ wăl mkăn nao ti Lạc Dương mâo Êpul čŏng kriê dlăng čih dŭm klei hâo hưn

Să Dă Sar, kdriêk Lạc Dương bi knông hŏng ƀuôn prŏng Đà Lạt, lehanăn mâo êlan dơ̆ng prŏng 27C, kyuanăn grăp hruê mâo lu mnuih mŭt kbiă hlăm alŭ wăl. Phan Ngọc Giáo, ti ƀuôn hgŭm mrô 9, ƀuôn prŏng Đà Lạt, pô găn êrô nanao anôk gak răng klei ruă tưp Covid-19 ti nei brei thâo, Kyua mâo đang war pla mjing hlăm alŭ wăl, grăp hruê ñu lehanăn lu mnuih mơ̆ng anôk mkăn hriê tinei. Grăp blư̆ hriê srăng hưn mdah ênŭm klei suaih pral, khădah luič mmông ƀiădah anei jing bruă năng. Phạm Ngọc Giáo lač:

“Ngă sơnăn yơh jing jăk êdi, kyua pô mĭn kơ yang ƀuôn amâo djŏ ôh yang ƀuôn mĭn kơ pô. Kâo ƀuh anei jing klei ngă bruă jăk djŏ hŏng wưng klei ruă tưp. klei ruă tưp ară anei drei amâo thâo ƀuh ôh, kăn thâo ti anôk ñu dôk, kyuanăn mâo klei răng jing jăk hĭn.”

Wăt mnuih ƀuôn sang găn êrô ăt dưi hưn klei suaih pral djăp ênŭm

Amâo djŏ knŏng hjan să Dă Sar, dŭm alŭ, ƀuôn, êpul ƀuôn sang mơ̆ng dŭm să, wăl krah ti kdriêk Lạc Dương mâo sơăi êpul čŏng răng mgang anôk mtah, anôk amâo mâo klei ruă tưp Covid-19 lehanăn mâo klei sa ai mơ̆ng mnuih ƀuôn sang. Tui si amai Kơ Să Ka Liêm, khua bruă Êdam Êra ti să Dă Ñim, êlâo dih mnuih ƀuôn sang ka jăk mâo ôh klei thâo săng hlăm klei ngă dŭm hdră gang mkhư̆ klei ruă tưp Covid-19. Mơ̆ng hruê mkŏ mjing êpul čŏng răng mgang anôk mtah, phung ngă bruă mđĭ hĭn bruă hâo hưn, kyuanăn ară anei grăp čô ngă sơăi bruă truă čhiăm guôm ƀô̆, hưn mdah klei suaih pral tơdah kbiă mơ̆ng alŭ wăl.

“Phŭn mrâo mkŏ mjing anôk gak răng mâo klei dleh dlan, ƀiădah hlăm bruă hâo hưn kơ mnuih ƀuôn sang mđĭ klei thâo săng hlăm bruă gang mkhư̆ klei ruă tưp Covid-19 mâo yơh klei mdul. Ară anei, mnuih ƀuôn sang wăt kơ phung hđeh êdam êra ngă jăk sơăi bruă gang mkhư̆ klei ruă tưp, truă nanao čhiăm guôm ƀô̆ lehanăn ngă djŏ 5 mta klei mtă tơdah kbiă ti tač”.

Dŭm anôk gak răng mơ̆ng Êpul čŏng kriê dlăng krĭng ka mâo mnuih ruă ti kdriêk Lạc Dương đru mguôp yuôm bhăn hlăm bruă gang mkhư̆ klei ruă Covid-19 ti alŭ wăl

Lạc Dương jing kdriêk mâo lu hĭn mnuih djuê ana K’Ho dôk hdĭp mda. Khădah bi knông hŏng ƀuôn prŏng Đà Lạt, jing anôk mâo lu mnuih mâo klei ruă tưp Covid-19 hĭn ti čar Lâm Đồng, ƀiădah ară anei kdriêk Lạc Dương jing alŭ wăl ka mâo ôh mnuih mâo klei ruă tưp Covid-19. Dưi mâo klei tŭ dưn anei, êngao kơ klei gĭr mơ̆ng êpul êya ngă bruă, bruă sang čư̆ êa, dŭm êpul čŏng răng mgang anôk mtah, hlăm ƀuôn sang mâo bruă klam yuôm bhăn, đru mguôp prŏng hlăm bruă gang mkhư̆ klei ruă tưp Covid-19 ti kdriêk Lạc Dương lehanăn kluôm čar Lâm Đồng.

Pô mblang: Y-Ƀel Êban