VOV4.Êđê - Kyua hmăi mơ̆ng klei ruă Covid 19, hlăm wưng êgao, lu ƀĭng ngă lŏ hma ti čar Lâm Đồng lĕ hlăm klei dleh dlan kyua amâo h’ĭt anôk hrui blei mnơ̆ng dhơ̆ng. Čiăng msir mghaih klei anei, anôk bruă lŏ hma Lâm Đồng dôk tă hdră êlan kơ ƀĭng ngă lŏ hma mđĭ bruă pla mjing djam mtam, boh kroh hlăm wưng lŏ hdĭp hŏng klei găl mrâo msĕ yăng đar.

Dŭm hruê êgao, gŏ sang amai Nguyễn Thị Mơ, ti ƀuôn hgŭm mrô 8, ƀuôn prŏng Đà Lạt jah waih hĕ jih đang war pla mnga hlăm gŏ sang leh anăn lŏ pla dŭm mta djam mtam, êtak êbai mkăn, mâo klei rui pĕ nanao. Amai Mơ brei thâo, kyua hmăi mơ̆ng klei ruă tưp Covid-19, klei pla mjing, khăt čhĭ dhan mnga luič hơăi mang. Bruă mpla mnga amâo lŏ găl kyuanăn gŏ sang mlih pla ana mrêč prong boh leh anăn djam mtam, êtak êbai mkăn.

 “Ară anei mnơ̆ng dhơ̆ng kčưm đĭ ênoh sơăi, klei găl mơ̆ng amrêč prŏng boh mâo hruê mmông hrui pĕ sui hĭn mkă hŏng dŭm mta djam mkăn. Dŭm mnơ̆ng dhơ̆ng duh bi liê lu prăk kăk ƀiădah knŏng ƀiă hruê hrui pĕ mâo klei luič liê lu, luič mang truh kơ 80%. Bi kơ amrêč nei mâo prăk mnga truh kơ 2 blư̆, hruê mmông hrui pĕ sui ƀiă. Bi kơ dŭm mta mnga msĕ si mnga Cúc, mnga yang hrue tuh hwiê hlăm đang war luič hơăi mang truh kơ 100%.

Čiăng kơ dŭm bruă pal mjing djŏ găl hŏng wưng klei ruă tưp Covid-19 hlăm klei aguah tlam mrâo, knơ̆ng bruă lŏ hma čar Lâm Đồng mkŏ mjing leh hdră êlan klei ngă bruă tui si êlan bi mâo ênŭm hlăm anôk mnia mblei leh anăn rơ̆ng hdră ngă bruă hŏng prăk ba wĭt kơ mnuih ƀuôn sang. Tui si Nguyễn Văn Châu, kơiăng khua kiă kriê knơ̆ng bruă lŏ hma leh anăn mđĭ kyar krĭng ƀuôn sang čar Lâm Đồng brei thâo hdră anei kñăm tă hdră kơ ƀĭng ngă lŏ hma tui si klei ngă bruă djŏ guôp, rơ̆ng mkăp brei ênŭm kơ anôk mnia mblei mâo kah knar hlăm brô 6.800 tôn djam mtam, êtak êbai dŭm mta hlăm sa hruê. Hlăm anăn kñăm kơ bruă mlih klei pla mjing mơ̆ng dŭm mta ana dôk mâo klei dleh dlan msĕ si mnga khăt dhan ƀiă hruê, hrô pla dŭm mta dja mtam, êtak êbai ƀiă hruê mkăn, ênưih pla mjing, mâo hruê hrui pĕ nanao, dưi djă pioh sui, mâo klei găl hlăm bruă dŭ mdiăng. Nguyễn văn Châu brei thâo:“2 mta mnơ̆ng mâo klei hmăi kjham hĭn hlăm wưng klei ruă tưp Covid-19 jing djam mtam leh anăn mnga. Čar Lâm Đồng bi mguôp leh hŏng dŭm alŭ wăl čiăng ksiêm dlăng leh anăn mkŏ mjing hdră êlan ngă bruă hmar, hdră tă ăt jing dưi rah mjeh djŏ hŏng ênhă tui si hdră kčah mtrŭn. Kah knar grăp hruê mkăp brei kơ anôk mnia mblei hlăm brô 6 êbâo 864 tôn djam mtam dŭm mta, bi hơĭt klei ngă bruă kơ mnuih ƀuôn sang leh anăn amâo mâo klei hmăi amâo jăk. Hmei mâo hdră tă jing bi hrŏ ênhă pla mjing djăm ƀơ̆ng hla leh anăn mlih sa kdrêč lăn pla mnga khăt dhan ƀiă hruê pla dŭm mta djam mtam čiăng dưi mkăp brei djăp klei čiăng anôk čhĭ mnia, amâo brei bi kpăk ôh.”

Mbĭt hŏng hdră tă bruă mkra mjing, knơ̆ng bruă lŏ hma čar Lâm Đồng ăt mđĭ klei ngă bruă hâo hưn, đăo knăl bruă đĭ kyar mkra mjing, ênoh ênil hlăm anôk čhĭ mnia… čiăng đru kơ ƀĭng ngă lŏ hma thâo čŏng ngă bruă hĭn. Boh nik mtă leh anăn ngă klei găl đru kơ ƀĭng ngă lŏ hma ngă klei bi mguôp hŏng dŭm knơ̆ng bruă, êpul bi mguôp čiăng mâo anôk ba čhĭ mnơ̆ng dhơ̆ng hơĭt.