VOV4.Êđê - Hlăm hruê kăm êgao, ti krĭng wăl Lăn Dap Kngư (boh nik 2 čar Dak Lak leh anăn Kon Tum) mâo nanao mnuih ruă Covid-19, hlăm anăn năng mđing hĭn phung ruă hlăm êpul êya. Ti anăp klei anei, bruă sang čư̆ êa leh anăn êpul bruă djŏ tuôm mđĭ ktang ksiêm dlăng kñăm gang mkhư̆ phŭn mtưp. Êpul aê mdrao mơ̆ng Sang êa drao Chợ Rẫy hriê ti Dak Lak čiăng đru mdrơ̆ng hŏng klei ruă tưp.

Ti čar kontum leh hmâo ƀuh dŭm pluh čô mâo klei ruă tưp djŏ kman Sar CoV 2 hlăm yang ƀuôn, mơ̆ng hrue kăm êlâo, êpul bruă djŏ tuôm čar čuăl leh krĭng  hlăm sa wăl prŏng, mơ̆ng hrue kăm êlâo, tui duah mnuih jing F1; F2; F3 kñăm gang mkhư̆ klei bi mtưp hlăm yang ƀuôn, lehanăn hlăm dŭm anôk bi ktlah sa anôk. leh kơ năn, knơ̆ng bruă sang čư̆ êa čar kontum mkŏ mjing leh klei bi kƀĭn online hŏng 10 kdriêk, ƀuôn prŏng lehanăn 102 boh să, ƀuôn hgŭm, wăl krah čar. Blŭ hrăm gĭt gai ti anôk bi kƀĭn mjêč anei, Lê Ngọc Tuấn, khua knơ̆ng bruă sang čư̆ êa čar kontum mtă kơ dŭm alŭ wăl ngă bi jăk klei čuăl krĭng mâo klei ruă tưp, mbĭt hŏng anăn mkhư̆ bi kjăp phŭn bi mtưp klei ruă Covid 19 hlăm yang ƀuôn lehanăn hlăm dŭm anôk bi ktlah: "Jih jang dŭm anôk bi ktlah mâo lu mnuih, ênưih snăk truh kơ klei bi mtưp hdơ̆ng găp ti anôk bi ktlah. Êpul kiă kriê alŭ bi ktah bi mđĭ hĭn bruă ksiêm dlăng alŭ wăl bi ktlah, alŭ wăl mdrao mgŭn. Klei bi ktlah ti sang mđĭ bruă kơ êpul kiă kriê gang mkhư̆ Covid hlăm yang ƀuôn, wăt hlăm jih jang bruă kđĭ čar bi ksiêm dlăng kiă kriê. Tơdah hmao ƀuh mnuih dôk bi ktlah kơ sang hlue ngă amâo mâo kjăp bruă mta klei bi ktlah snăn hlŏng mđuĕ ba bi ktlah sa anôk”.

Ti anôk bi kƀĭn bi trông bruă hŏng bruă klei mrâo mlan 10 leh êgao, mâo Êpul kiă kriê bruă hâo hưn čar Kontum, Nguyễn Đình Cầu, k’iăng khua adŭ bruă knơ̆ng bruă sang čư̆ êa čar Kontum brei thâo, alŭ wăl mkŏ mjing nanao pôih kăp kiă răng ti dŭm kdrêč êlan dơ̆ng prŏng mŭt hlăm čar. Anei jing dŭm anôk gak răng kơ klei ruă tưp, amâo mâo djŏ ksiêm dlăng klei êrô hiu êdeh êdâo ôh, snăn bru anei dôk ngă nanao. Boh sĭt brei ƀuh, êpul bruă djŏ tuôm hmao ƀuh leh đa đa mnuih mâo kman ti anôk gak răng mrô 1 Sao mai, ƀuôn prŏng Konum, lehanăn pôih gak răng mrô 2 ti kčŭn čư̆ loso, kdriêk Dak Glei hlăm êlan Hồ Chí Minh. Hŏng dŭm klei bi mtưp Covid 19 hlăm anôk bi ktlah lehanăn hlăm êngao yang ƀuôn,

Nguyễn Đình Cầu, k’iăng khua adŭ bruă Knơ̆ng bruă sang čư̆ êa čar Kontum brei thâo:“Leh bi ktlah sa anôk truh 14 hrue, hlăm anôk bi ktlah anăn mâo lu mnuih mâo mkă dlăng truh 3 blư̆ leh amâo mâo ƀuh kman ôh. Ƀiădah leh êdei kơ anăn mâo 2;3 hrue êdei, amâodah hlăm sa hrue kăm êdei lŏ mâo kman. Klei anei jing sa klei dôk mđam klei ruă sui, lehanăn năng ai jing klei bi mtưp hdơ̆ng găp hlăm anôk bi ktlah hei. Klei tal dua jing leh bi ktlah sa anôk lŏ wĭt bi ktlah ti sang, diñu ka hlue gưt djŏ hŏng klei mtă ôh, mơ̆ng anăn mơh ênưih bi mtưp truh hlăm yang ƀuôn. Bruă ksiêm dlăng mơ̆ng dŭm êpul mdrơ̆ng hŏng klei ruă tưp hlăm yang ƀuôn nga ka bi leh ôh bruă jao”.

Ti anăp klei phung leh jih hrue hlăm anôk bi ktlah sa anôk wĭt lŏ dơ̆ng bi ktlah si sang lŏ dơ̆ng ƀuh mâo kman mơ̆ng anăn ngă bi mtưp hlăm yang ƀuôn, mâo đa đa kdriêk, ƀuôn prŏng čar kontum mtrŭt phung ƀuôn sang akâo lŏ dôk hlăm anôk bi ktlah thiăm 7 hrue dơ̆ng.

Ti Daklak, hrue kăm êgao jing anôk mâo klei ruă tưp lu êdi, anôk mâo klei ruă tưp mrâo bluh đĭ amâo mâo mdei, boh nik ti ƀuôn prŏng Ƀuôn Ama Thuôt. Boh nik hlăm sa hrue mâo truh 174 čô mnuih djŏ kman, anei yơh jing ênoh prŏng hĭn êdi mơ̆ng êlâo dih truh kơ ară anei, lu hĭn êdi jing ti kdriêk Čư̆ Mgar, krông Ƀŭk, wăl krah Ƀuôn Hô, lehanăn ƀuôn prŏng Ƀuôn Ama Thuôt.

Ti anăp klei ruă tưp hlăk hlê bluh đĭ ktang, hrue kăm êgao, phung nai aê mdrao mơ̆ng sang êa drao prŏng Chợ Rẫy mâo leh mmông mă bruă hŏng phung khua kiă kriê, lehanăn êpul phung nai aê mdrao sang êa drao prŏng Krĭng Lăn Dap Kngư. Aê mdrao Nguyễn Đại Phong, khua kiă kriê sang êa drao prŏng Krĭng Lăn Dap kngư brei thâo: Jih jang klei đru mguôp mơ̆ng Êpul ngă bruă kơ bruă hrŏng duah ba bi ktlah, lehanăn mdrao mgŭn mnuih mâo klei ruă srăng đru kơ sang êa drao bi leh jăk hĭn hlăm bruă mdrao mgŭn mnuih mâo klei ruă tưp "Êpul ngă bruă mơ̆ng sang êa drao Chợ Rẫy diñu mưng kjăp leh hlăm bruă mdrao mgŭn klei ruă tưp Covid 19 ti ƀuôn prŏng Hồ Chí Minh lehanăn hlăm kwar Dhŭng, kwar Krah ară anei truh kơ anei čiăng đru kơ sang êa drao prŏng Krĭng Lăn Dap kngư ƀuh jih ya mta anôk adôk ka djŏ hlăm sang êa drao. Klei yuôm bhăn hĭn jing diñu srăng đru kơ sang êa drao hlăm bruă mdrao mgŭn, lehanăn đru kơ jih jang kdrăp mdrao mgŭn digơ̆ kƀah, srăng akâo mơ̆ng sang êa drao Chợ Rẫy đru mbĭt hŏng phŭn bruă mdrao mgŭn”.

Hrue kăm êgao, êpul knuă druh bruă mdrao mgŭn mơ̆ng sang êa drao Chợ Rẫy nao ksiêm dlăng leh jih jang anôk mkŏ mjing sang êa drao jing jai, dŭm anôk mdrao mgŭn, anôk bi ktlah, mkŏ mjing hdră mă bruă kơ čar hlăm bruă mbha êpul gưl mdrao mgŭn, ksiêk mbha mnuih ruă, nao hlăm dŭm klei bi trông hŏng êpul khua kiă kriê bruă mdrơ̆ng hŏng klei ruă tưp čar Daklak; bi kƀĭn online hŏng êpul bruă mdrao mgŭn lehanăn êpul khua kiă kriê čar, dŭm anôk bruă mdrao mgŭn... lehanăn ară anei, phung aê mdrao, nai êa drao sang êa drao Chợ Rẫy lŏ dơ̆ng dôk truh sa hrue kăm pioh đru kơ Daklak hlăm bruă mdrơ̆ng hŏng klei ruă tưp./.