VOV4.Êđê -  Hrue mbrue (22/10) Khua bi ala knŭk kna Việt Nam ti Khon Kaen bi mguôp leh hŏng bruă sang čư̆ êa lehanăn Êpul hgŭm mnuih Thailand phŭn agha Việt Nam hlăm čar Nakhon Phanom mkŏ mjing kdrưh k’ăm bi hdơr 45 thŭn hrue mjĕ mgiăm hgŭm mbĭt Việt Nam – Thailand bi ƀuôn hgŭm mbĭt Thái – Việt hlăm ƀuôn Mĕi, anôk khua gĭt gai Hồ Chí Minh tuôm jưh jơ̆ng tal êlâo hlăm mlan 7/1928. Blŭ hrăm ti knăm bi hdơr anei, Khua bi ala knŭk kna Việt Nam ti Khon kaen jing Chu Đức Dũng lač, 45 thŭn leh êgao, Việt Nam lehanăn Thailand mđrăm mbĭt gĭr ba klei bi mguôp dua nah mâo klei đĭ kyar kjăp, ksul mbŭ klei bi mguôp hgŭm bruă, bi đăo knang, thâo bi mpŭ, hlăm klei mtăp mđơr hrăm mbĭt mâo klei tŭ dưn. Thailand ară anei jing leh ala čar hgŭm yuôm bhăn tal êlâo hŏng Việt Nam hlăm ASEAN. Tui si Chu Đức Dũng, ti anôk bi blŭ hrăm hlăm đĭng blŭ plah wah khua knŭk kna dua ala čar Việt nam lehanăn Thailand hlăm mlan 5 leh êgao, dua čô khua gĭt gai mâo leh klei bi tŭ ư bruă gang mkhư̆ klei ruă tưp Covid 19 ară anei, kñăm čiăng mâo klei bi mguôp hĭn, mtrŭn agha êlam hĭn, đru ba klei trei mđao klei jăk yâo kơ phung ƀuôn sang dua ala čar, ktưn ba wĭt ênoh bi mnia mblei dua nah truh 25 êklai dolar ti thŭn 2025.

Ƀri wưng anei, sa klei yuôm mdah rup kơ klei hdĭp khua gĭt gai Hồ Chí Minh lehanăn 45 thŭn klei mjĕ mgiăm hgŭm mbĭt Việt Nam Thailand bi rang mdah mnơ̆ng dhơ̆ng čhĭ mnia mbĭt mâo iêo jak leh lu mnuih nao dlăng./.

Y Khem pô mblang