VOV4.Êđê- Leh ƀuôn prŏng Hồ Chí Minh ba mdah Asăp mtrŭn mrô 18, dưi brei mnuih ƀuôn sang nao kơ ƀuôn prŏng ƀiădah mâo dŭm klei ba mgrơ̆ng, dŭm čar krĭng Ngŏ kwar Dhŭng mâo leh hdră kčah brei mnuih mă bruă dưi găn êrô hlăm dŭm alŭ wăl. Anôk bruă sang čư̆ êa čar Long An tŭ ư brei mnuih mă bruă găn êrô nao kơ ƀuôn prŏng Hồ Chí Minh lehanăn dŭm čar Bình Dương, Đồng Nai, Tây Ninh. Khă snăn, čar Long An akâo kơ Anôk bruă sang čư̆ êa ƀuôn prŏng Hồ Chí Minh lui hră m’ar mâo bi mklă êlâo, knŏng hưn mdah hră m’ar mơ̆ng anôk bruă duh mkra mâo Knơ̆ng bruă êlan klông dŭ mdiăng hlăm krĭng mkăp.

Anôk bruă sang čư̆ êa čar Tây Ninh tŭ ư hŏng hdră kčah anei lehanăn đru mguôp klei blŭ hlăm klei ba mgrơ̆ng hŏng mnuih tlŏ leh vaccine jing dưi tlŏ ƀiă êdi sa aruăt hlăm wang 21 hruê amâo dah hlao leh Covid 19 hlăm wang 6 mlan mbĭt anăn mâo boh tŭ ksiêm dlăng amâo ƀuh kman hlăm wang 72 mmông. Čar Bình Dương dưi brei nao tŭ drông mnuih mă bruă, phung thơ̆ng kơ bruă mơ̆ng dŭm čar, ƀuôn prŏng hŏng êdeh prŏng./.

Pô mblang: H’Nêč Êñuôl