VOV4.Êđê -  Kyua adiê hjan prŏng sui hruê, hlăm ktuê êlan Ngŏ Duôr Čư̆ Prŏng kdrêč găn alŭ wăl kdriêk Kon Plông, čar Kon Tum mâo klei klưh hroh lăn kjham. Mbĭt hŏng bruă pŏk ngă lŏ mkra mjing msir mgaih, hlăm hruê 9/11, êpul bruă djŏ tuôm brei êdeh êdâo mdei êjai găn êrô hlăm ktuê êlan anei čiăng rơ̆ng êđăp ênang hlăm êlan klông.

Anôk klưh hroh lăn ti ktuê êlan Ngŏ Duôr Čư̆ Prŏng, kdrêč găn kdriêk Kon Plông, čar Kon Tum mâo ti km 176+300 kbưi hŏng să Ngọc Tem hlăm brô 1km. Ti anôk anei, klưh hroh hlăm êlan êlam truh 2m ngă kơ 2/3 êlan jhat leh anăn ngă klưh 2 pŏk bêtông xi măng hlăm ktuê êlan hŏng boh dlông 10 m ênưih ngă kđang êlan. 

Anôk bruă kriê dlăng êlan klông III.4 gĭt gai anôk bruă kriê dlăng êlan klông ba nao mnuih, êdeh êdâo mă bruă čiăng pŏk sa êlan ti nah dlông. Êlâo anăn, Knơ̆ng bruă kriê dlăng êlan klông III.4 ăt akâo kơ anôk bruă djŏ tuôm čdar Kon Tum hưn mthâo lar ƀar hlăm kdrăp hâo hưn kơ klei đuôm kpăk hlăm ktuê êlan čiăng kơ mnuih ƀuôn sang thâo leh anăn brei êdeh êdâo mdei êgăn êrô êjai hlăm ktuê êlan Ngŏ Duôr Čư̆ Prŏng, kdrêč găn čar Kon Tum êlan leh msir mgaih.

H Zawut pô mblang