VOV4.Êđê - Aguah mbrue (1/11), k’iăng khua knŭk kna Lê Văn Thành kiă kriê leh klei bi kƀĭn online kơ bruă ruh mgaih anôk ala lehanăn rŭ mkra tač êdeh phiơr prŏng Long Thành, Đồng Nai. Klei hâo mdha mơ̆ng phŭn bruă êlan klông brei thâo, truh kơ ară anei bruă ruh mgaih anôk ala pioh mkra tač êdeh phiơr prŏng Long Thành, hlăm ênoh jih jang 5 êbâo ha lăn snăn mâo hrui mă leh 3 êbâo 800 ha jing giăm 77% hdră kčah. Hŏng ênoh čiăng rŭ mkra mnư̆ mnang truh 75% hnơ̆ng bruă knuă.

Klah čŭn ti anôk bi kƀĭn, K’iăng khua knŭk kna Lê Văn Thành brei thâo anei jing bruă rŭ mkra prŏng. Dŭm hdră mtrŭn mơ̆ng gưl dlông mâo bi klă leh anei jing bruă phŭn, lehanăn anăp brei bi leh hlăm thŭn 2025. Êjai rŭ mkra tač êdeh phiơr anei srăng đru bi hrŏ klei ktrŏ kơ ƀuôn prŏng Hồ Chí Minh, lehanăn lŏ jing boh kdrŭt mđĭ kyar bruă duh mkra mrâo hlăm kluôm krĭng, boh nik hŏng čar Đồng Nai. Kyuanăn, năng rŭ mkra lehanăn dưi bi leh djŏ hŏng wưng kčah. Êlâo hĭn bi leh pral bruă čuk hli djŏ tui si klei čih mkra leh mơ̆ng Phŭn bruă êlan klông dŭ mdiăng čiăng kơ akŏ mlan 1/2022 srăng dơ̆ng rŭ mkra./.

Y Ƀel pô mblang