VOV4.Êđê- Hluê si klei ksiêm yap mơ̆ng bruă lŏ hma, čar Dak Lak ară anei mâo truh 62 bĭt knơ̆ng kdơ̆ng êa jhat rai čiăng duh bi liê mkra mđĭ. Ti anăp klei anei, hlăm yan hjan êa lip, dŭm alŭ wăl, anôk bruă ti Dak Lak dôk mđĭ lar klei blŭ 4 ti năn mtam čiăng rơ̆ng êđăp ênang kơ knơ̆ng êa lehanăn krĭng nah tluôn.

Mơ̆ng akŏ mlan 9 truh kơ ară anei, knơ̆ng kdơ̆ng êa Êa Drăng, ti wăl krah Êa Drăng, kdriêk Êa Hleo, čar Daklak pŏk êa jêñ jêñ, kăp lŏ mbŏ êa pioh krơ̆ng kơ gưl hlĭm hjan.

Anôk êa đoh ƀiă, kdơ̆ng êa Ea Drăng mđoh nanao êa hnưm čiăng mprăp kơ adiê hjan

Nguyễn Văn Hiếu, khua knơ̆ng kiă kriê knơ̆ng kdơ̆ng êa kdriêk Êa Hleo brei thâo, mă klei hriăm mơ̆ng klei êa mlan knơ̆ng kdơ̆ng êa, ba klei ê alip lêč hlăm krĭng nah tluôn thŭn 2013 kyua êlan mđuĕ êa jing điêt hĕ, mơ̆ng anăn hjan hlĭm truh êpul êya bruă brei gak răng hrue mlam kăp pŏk êa, rơ̆ng dưi ba klei êđăp ênang kơ phung ƀuôn sang ti wăl krah Êa Drăng:

“Knơ̆ng kdơ̆ng êa anei mâo ênhă êlah êa jing prŏng truh 58,6 km², lehanăn hnơ̆ng dưi mgơ̆ng êa jing 1 êklăk 217 êbâo m³ êa, snăn kăp mđing hŏng klei đăo knăl yan adiê srăng mâo hdră êlan pŏk lehanăn kđăl êa bi djŏ guôp. Bi ară anei tơdah pŏk hĕ êa hlăm brô mơ̆ng 30 – 40m²/secon snăn êngăp leh jih war djam phung ƀuôn sang, mơ̆ng anăn mkă hnơ̆ng klei jing sĭt hlăm klei hdĭp bi pŏk jêñ blư̆ hĭn pioh bi kna hnơ̆ng êa hlăm ênao mgơ̆ng, kñăm pioh mjing knơ̆ng dưi mgơ̆ng êa man trĭp pioh drông yan êa đĭ, đăm lĕ hlăm klei amâo mâo jăk hŏng phung ƀuôn sang”.

 Knơ̆ng kdơ̆ng êa ƀuôn Pu Huê amâo mđoh ôh êa, êa srăng dlai hlăm  ktuê êlan mlir să Ea Ktur - Čư̆ Wi sĭt adiê hjan êa lip

Kăp tui ksiêm yan adiê hlăm grăp hruê, dăp mnuih gak răng hrue mlam ti dŭm knơ̆ng kdơ̆ng êa, hŏng klei dôk tianăn mtam, djăp alŭ wăl êpul bruă kiă kriê knơ̆ng kdơ̆ng êa hlăm čar Daklak hlak mâo dŭm hdră hŏng klei djŏ pŏk kđăl êa bi êđăp ênang, êjai hlăm yan hjan hlĭm êa lip lêč. Trịnh Văn Quang, pô kiă kriê knơ̆ng kdơ̆ng êa ti ƀuôn Pu Huê, brei thâo, knơ̆ng kdơ̆ng êa anei hlŏng jing êlan dơ̆ng dlông knơ̆ng êa, jing êlan nao kơ să Êa Ktur; Čư̆ Wi; Êa Hu hlăm kdriêk Čư̆ Kuiñ anei, ƀiădah lĕ amâo mâo mkra ôh êlan êa mlai kăp mđuĕ êa. Klei anei ngă leh kơ ênao mgơ̆ng êa ƀuôn Pu Huê dôk nanao hlăm klei amâo mâo hơĭt ôh tơdah dôk hlăm yan hjan hlĭm:

“Boh prŏng mbah ƀăng ƀi pŏk kđăl êa anei amâo mâo djăp ôh ênoh čuăn mđuĕ êa lêč, mơ̆ng anăn mơh jing dleh snăk pŏk mđuĕ êa amâo mâo hrŏ pral ôh, tơl êa mlai truh hlăm êlan jing ênưih ba klei amâo mâo jăk kơ knơ̆ng kdơ̆ng êa, lehanăn kăn ba klei êdăp ênang kơ mnuih găn êrô hlăm êlan klông rei. Snăn hlăm yan hjan hlĭm hmei ngă bi kjăp hdră mâo bi klă, mơ̆ng mâo klei mtă brei kiă ti dua nah akŏ tluôm knơ̆ng kdơ̆ng êa anei, čiăng bi đru răng mgang klei êđăp ênang hĭn. Ăt čang hmăng mơh hlăm wưng kơ anăp mâo dŭm gưl bi ksiêm duah čiăng dưi mâo hdră lŏ mkra mđĭ bi kjăp knơ̆ng kdơ̆ng êa, lehanăn rơ̆ng klei êđăp ênang kơ kdrêč êlan găn dlông knơ̆ng êa”.

 Knơ̆ng kdơ̆ng êa jhat rai kjham, ênao mgơ̆ng êa Phù Mỹ, kdriêk Ea Hleo amâo dưi mgơ̆ng êa

Tui si klei hâo mdah mơ̆ng knơ̆ng bruă lŏ hma čar Daklak, kluôm čar ară anei mâo 785 knơ̆ng kdơ̆ng êa, pioh krih mđoh kơ êbeh 262 êbâo ha mnơ̆ng pla mjing djăp mta, jing knar hŏng 82% ênoh čiăng kơ êa krih mnơ̆ng pla mjing. Čiăng rơ̆ng dưi mâo klei êđăp ênang hlăm yan hlĭm hjan, čar mâo leh bruă ksiêm dlăng, pral lŏ mkra wĭt leh 18 boh knơ̆ng kdơ̆ng êa phŭn, ênao mgơ̆ng êa leh jhat sô, hŏng ênoh bi liê jih jang êbeh 360 êklai prăk.

Knơ̆ng kdơ̆ng êa Ea Msen kdriêk Mrak amâo êđăp ênang ôh hlăm yan hjan êa lip

Tui si Nguyễn Thành Long, Khua kiă kriê knơ̆ng kdơ̆ng êa čar Daklak kyua prăk mơ̆ng alŭ wăl bi liê kơ bruă lŏ mkra wĭt jing ƀiă, snăn bruă pioh kơ klei mkra wĭt pătdah djăp knơ̆ng kdơ̆ng êa amâo mâo djăp ôh lŏ akâo kơ nah dlông, hŏng bruă tal êlâo jing čiăng bi mâo klei êđăp ênang kơ knơ̆ng kdơ̆ng êa hlăm yan hjan hlĭm, lehanăn bi iêo jak jih jang ngă bruă 4 ti anăn mtam, čŏng mâo hdră êlan răng kriê mơ̆ng nah gŭ:

“Hŏng êpul êya kiă kriê ba yua êa jua, snăn čŏng bi đru duah prăk lŏ mkra wĭt êjai, boh nik hlăm dŭm anôk jing jhat anăp amâo mâo klei êđăp ênang ôh snăn bi mkra mtam. Tal dua, jing hlăm yan hjan hlĭm anei brei mâo mnuih gak răng hrue lehanăn mlam mtam, tơdah pŏk êa snăn mâo klei hưn mthâo hŏng jih jang phung ƀuôn sang thâo. Lehanăn jêñ jêñ bi ksiêm dlăng hnơ̆ng êđăp ênang mơ̆ng knơ̆ng êa, kñăm pral mâo klei hâo mdah hŏng bruă sang čư̆ êa alŭ wăl, lehanăn knơ̆ng bruă lŏ hma pioh mâo hdră mghaih msir bi hmao mtam”./.

Pô mblang: Y-Khem Niê