VOV4.Êđê - Hlăm hdră bi kƀĭn tal 2, anôk bruă kƀĭn ala gưl 15, aguah anei hruê 21/10, anôk bruă kƀĭn ala bi trông leh hluê êpul hưn mthâo kơ hdră mdrơ̆ng hŏng klei ruă Covid 19 lehanăn hluê ngă Hdră mtrŭn mrô 30 thŭn 2021 kơ klei bi kƀĭn tal sa, anôk bruă kƀĭn ala gưl 15. Lu phung bi ala tŭ ư hŏng dŭm klei hriăm dưi mâo, mta kñăm, klei mĭn, bruă klam gang mkhư̆ Covid 19 hlăm wưng ti anăp mâo hưn mdah leh, hlăm anăn mđing kơ hdră mdrơ̆ng hŏng klei ruă Covid 19 êđăp ênang kñăm rơ̆ng hdră đru kơ yang ƀuôn. Knŭk kna ba mdah leh dŭm bruă klam, hdră msir phŭn, hlăm anăn mđing hluê ngă, pral, djŏ guôp, tŭ dưn mta kñăm gang mkhư̆ klei ruă Covid 19 êjai, lŏ krŭ wĭt, mđĭ kyar bruă duh mkra – ala ƀuôn êjai; pŏk ngă tŭ dưn Hdră êlan kluôm hlăm bruă gang mkhư̆ klei ruă tưp, mâo hdră mdrơ̆ng djŏ guôp, êđăp ênang, ksiêm dlăng tŭ dưn klei ruă Covid 19, dlăng anei jing bruă klam yuôm bhăn, mjêč mơ̆ng dŭm gưl, dhar bruă mơ̆ng akŏ thŭn 2022 mtam./.

H Nêč pô mblang