VOV4.Êđê- Aguah hruê 5/10, ti Hà Nội, Êpul bruă Đội gưl dlông bi hgŭm hŏng Êpul hgŭm Sinh viên Việt Nam lehanăn Anôk bruă mguôp hnư Êpul group Thiên Long mkŏ mjing bruă “Mđup brei kdrăp mnơ̆ng hriăm hră – Đru mđĭ klei thâo” thŭn 2021 kñăm đru kơ phung hđeh hriăm hră, sinh viên hmăi mơ̆ng klei ruă tưp mâo djăp klei găl dưi hriăm hră. Hdră anei dưi pŏk ngă ti dŭm čar, ƀuôn prŏng dôk bi ktlah yang ƀuôn lehanăn dŭm čar, ƀuôn prŏng hmăi kjham mơ̆ng klei ruă Covid 19, mđing truh kơ phung hđeh, sinh viên jing aneh aneh mnuih djuê ƀiă, gŏ sang ƀun, anak čô mnuih mă bruă hlăm wăl tuh tia mkra mjing lehanăn anak aneh phung knuă druh, lĭng kahan, phung nai aê mdrao nao hlăm hdră gang mkhư̆ klei ruă tưp mâo klei hdĭp dleh dlan. Mơ̆ng ară anei truh kơ knhal jih thŭn, hdră “Mđup brei kdrăp mnơ̆ng hriăm hră – Đru mđĭ klei thâo” srăng mđup brei êbeh 8 êbâo hnư mnơ̆ng, 650 hnư prăk đru hriăm hră kơ phung hđeh gưl 1,2; 200 hnư prăk đru hriăm hră kơ phung sinh viên ƀun; 20 êbâo hnư mnơ̆ng kơ phung hđeh ƀun, dleh dlan, krĭng taih kbưi wưng thŭn 2021-2025./.

Pô mblang: H’Nêč Êñuôl