VOV4.Êđê- Hlăm wưng êgao, mbĭt hŏng bruă sang čư̆ êa leh anăn bruă djŏ tuôm, dŭm êpul bruă klei đaŏ ti čar Dak Lak ăt mâo leh lu bruă ngă klă sĭt, bi đru klam klei dleh dlan hŏng mnuih ƀuôn sang mâo klei ruă tưp Covid-19. Hlăm gưl bluh mâo tal 4 anei, Êpul bi ala kiă kriê Sang Aê Diê Klei Mrâo Mrang Jăk čar Dak Lak mđup brei leh giăm 5.500 hnư mnơ̆ng truh kơ mnuih ƀuôn sang krĭng mâo klei ruă tưp, hŏng ênoh êbeh 1 êklai 5 êtuh êklăk prăk. Mbĭt hŏng anăn, Knơ̆ng bruă mdrao mgŭn - ala ƀuôn mơ̆ng Sang Aê Diê Klei Mrâo Mrang Jăk Việt Nam kwar Dhŭng ăt đru kơ dŭm gŏ sang mâo mnuih ruă F0 leh anăn F1 čar Dak Lak dŭm hnư mnơ̆ng leh anăn prăk mâo ênoh 700 êklăk prăk.

Wưng leh êgao mâo lu boh êdeh mdiăng mnơ̆ng, anăn jing mnơ̆ng mơ̆ng ai tiê klei khăp êpul bi đru mơ̆ng Êpul bi ala kiă kriê klei đăo Klei mrâo Mrang Jăk čar Daklak truh leh hŏng phung ƀuôn sang hlăm dŭm anôk bi ktlah, alŭ wăl kwang dar kyua klei ruă tưp Covid 19, mđup brei mnơ̆ng truh ti kngan phung ƀuôn sang ti 26 boh alŭ ƀuôn hlăm čar Daklak. Anăn yơh jing dŭm anôk phung ƀuôn sang hdĭp bŏ hŏng klei dleh dlan kyua dôk hlăm klei bi ktlah kñăm gang mkhư̆ klei ruă tưp Covid 19.

Să Čư̆ Nĕ, kdriêk Krông Ƀŭk, jing sa anôk mâo klei ruă tưp prŏng ti čar Daklak wưng leh êgao. Hlăm anăn, dŭm gŏ êsei ti dŭm boh ƀuôn Đrao; Ƀuôn Dhiă, Ƀuôn Mui, Ƀuôn Kdrô ăt lĕ hlăm klei kwang dar sơăi. Tinei, mbĭt hŏng klei bi đru mơ̆ng dŭm êpul êya bruă ti alŭ wăl, phung ƀuôn sang lŏ mâo Êpul bi đru mơ̆ng Êpul kiă kriê Sang Aê Diê Klei Mrâo Mrang Jăk čar Daklak mđup brei leh  1 êbâo 465 hnư mnơ̆ng.

Êpul đru kơ ala ƀuôn mơ̆ng Êpul bi ala Kiă kriê Sang Aê Diê klei Mrâo mrang Jăk car Daklak  mđup brei mnơ̆ng ti Knơ̆ng bruă sang čư̆ êa să Čư̆ Nĕ, kdriêk Krông Ƀuk

Tŭ mă bi myuôm klei jăk jĭn mơ̆ng bruă anei, Y-Hiêp Êban, Khua bruă Đảng să Čư̆ Nĕ lač: Klei hdĭp mda phung ƀuôn sang kơ anei dôk hlăm klei dleh dlan leh, ƀai hĭn leh lŏ tuôm hŏng klei ruă tưp knư̆ hĭn mơh lŏ lĕ hlăm klei dleh dlan, mâo hĕ klei thâo bi đru kah êsei brei djam msĕ snei mơ̆ng phung mâo ai tiê kmah jing yuôm bhăn snăk, năng mpŭ êdi:

“Să Čư̆ Nĕ hmei bŏ hŏng klei mơak, kyua mâo tŭ mă mnơ̆ng bi đru mơ̆ng dŭm Êpul bruă klei đăo. Boh nik tinei, mâo Sang Aê Diê klei Mrâo Mrang Jăk čar Daklak đru leh kơ alŭ wăl hmei mnơ̆ng dhơ̆ng yuôm bhăn, kñăm mbha kơ phung ƀuôn sang, hŏng ai tiê bi kah êsei brei djam, khăp kơ mnuih riêng gah msĕ si khăp kơ asei mlei pô. Kâo bi ala kơ Êpul bruă Đảng lač jăk kơ dŭm êpul bruă lu snăk, boh nik Êpul bruă klei đăo Klei Mrâo Mrang Jăk čar Daklak"

Mlan 8 leh êgao, leh test pral hlăm să snăn ƀuh lu snăk mnuih mâo kman Sar CoV 2, kluôm să Čư̆ Bao, wăl Krah Ƀuôn Hô, čar Daklak nao hlăm klei kwang dar hlue asăp mtrŭn mrô 16 mơ̆ng khua knŭk kna, amâo mâo djŏ knŏng kƀah mnơ̆ng ƀơ̆ng huă kơ mnuih đuič ôh, ƀiădah kƀah wăt mnơ̆ng ƀơ̆ng kơ mnơ̆ng rông msĕ mơh. Ti anăp klei msĕ snăn, bruă sang čư̆ êa, dŭm êpul êya bruă, lehanăn phung mâo ai tiê kmah pral mâo mtam hdră bi đru. Y-Ƀan Ayŭn, khua ƀuôn ƀuôn Krum A, să Čư̆ Bao, wăl krah Ƀuôn Hô lač:

"Kâo mơak snăk kyua mâo phung thâo bi đru mđup brei leh mnơ̆ng kơ phung ƀuôn sang. Hlăm wưng dôk găn klei ruă tưp leh êgao jih jang mnơ̆ng mnuă yua hlăm klei hdĭp msĕ si ƀung hdang krô, braih mkuê̆, sĭk... Lač jăk kơ Êpul bi ala mâo mơĭt brei leh mnơ̆ng anei, asei mlei kâo pô lehanăn phung ƀuôn sang hlăm ƀuôn maơk snăk”.

Thâo săng kơ hdră êlan “Mdrơ̆ng hŏng klei ruă tưp msĕ si bi kdơ̆ng hŏng roh” mơ̆ng knŭk kna, hŏng ai tiê thâo bi đru, phung đăo lu boh Sang Aê Diê Klei Mrâo Mrang Jăk hlăm čar Daklak mâo nanao klei thâo uêñ mĭn hŏng adei tlang yang ƀuôn. Tui hlue hŏng hnơ̆ng thâo mâo lehanăn ai tiê klei khăp, mnuih mguôp braih, mnuih ba djam, hbei mtei, mâo mnuih mguôp ngăn đah pŏk pioh đru kơ phung ƀuôn sang hmăi amâo mâo jăk mơ̆ng klei ruă tưp Covid 19 dưi găn klei dleh dlan.

Phung đaŏ hlăm Sang Aê Diê Klei Mrâo Mrang Jăk  ti Ƀuôn Jung, să Ea Yông, kdriêk Krông Pač đŭng dŭm hnư mnơ̆ng

H'Oanh Ayŭn ti Ƀuôn Jŭng, să Êa Yông, kdriêk krông Pač mâo klei mĭn, hrăm mbĭt hŏng knŭk kna hlăm bruă mdrơ̆ng hŏng klei ruă tưp Covid 19 anăn jing "Mđup brei jing jăk hĭn kơ mă tŭ"

"Hrăm mbĭt hŏng knŭk kna, hlăm bruă bi đru kơ phung ƀuôn sang êjai dôk găn klei dleh dlan kyua klei truă tưp Covid 19, Ƀuôn Jŭng hmei iêo mthưr leh kơ jih jang phung đăo bi mguôp ai tiê mnuih mâo braih mguôp braih, mâo ƀung hdang, ngăn đah pŏk bi mguôp pioh đru kơ phung ƀuôn sang hlăk dôk găn klei ruă tưp. Hmei ngă djŏ hŏng klei knŭk kna dôk iêo mthưr mđrăm mbĭt mdrơ̆ng hŏng klei ruă tưp. Êjai hiu mđup brei mnơ̆ng hmei ăt tui ngă ênŭm hdră gang mkhư̆ răng mgang kơ asei mlei pô lehanăn kơ găp djuê lehanăn kơ mnuih mkăn”.

Khua Pô Mtô Ama Đebora - Lemous Philemon – Khua Êpul bi ala kiă kriê Sang Aê Diê Klei Mrâo Mrang Jăk čar Daklak brei thâo: Mơ̆ng leh mâo klei ruă tưp Covid 19 bluh mâo gưl tal 4 ti čar Daklak, êpul ngă bruă klei bi đru mơ̆ng Êpul bi ala kiă kriê Sang Aê Diê Klei Mrâo Mrang Jăk čar Daklak mâo mguôp brei leh giăm 5 êbâo 500 hnư mnơ̆ng, grăp hnư mâo braih, sa huôm ƀung hdang krô, êa msĭn, êa prăi, sĭk hŏng ênoh prăk mơ̆ng mơ̆ng 200 - 300 êbâo prăk. Mklin jih jang truh êbeh 1 êklai 500 êklăk prăk. Êngao kơ dŭm mnơ̆ng mđup brei kơ phung ƀuôn sang dôk hlăm krĭng mâo klei ruă tưp, Êpul bi ala kiă kriê Sang Aê Diê Klei Mrâo Mrang Jăk čar Daklak ăt lŏ mđup brei mnơ̆ng mơ̆ng Êpul bruă mdrao mgŭn mơ̆ng Sang Aê diê Klei Mrâo Mrang Jăk Việt Nam Kwar Dhŭng kơ dŭm gŏ sang mâo mnuih ruă jing Fo lehanăn F1 ti čar Daklak, hŏng ênoh jih jang mnơ̆ng mđup brei anăn giăm 700 êklăk prăk, mâo braih lehanăn ngăn đah pŏk.

Êpul bi ala Kiă kriê Sang Aê Diê klei Mrâo mrang Jăk car Daklak  mđup brei mnŏng ti să Čŭ Êbur, ƀuôn prŏng Ƀuôn Ama Thuôt

Mbĭt anăn, Êpul bi ala kiă kriê Sang Aê Diê Klei Mrâo Mrang Jăk čar Daklak ăt mkŏ mjing mơh êpul phung nai aê mdrao kăp kčĕ brei kơ klei suaih pral hlăm online kơ hlei pô mâo klei čiăng lŏ thâo săng hĭn kơ klei ruă tưp Covid 19, kơ hdră dlăng kriê suaih pral pô tal êlâo huĭdah amâo mâo myun tăp djŏ hĕ kman klei ruă tưp jing hĕ F0, thâodah F1; F2... Khua Pô Mtô Ama Dêbora - Lemous Philemon brei thâo:

“Êjai dôk găn klei ruă tưp Covid 19, boh nik jing klei bluh đĭ prŏng gưl tal 4 anei tưp lar pral snăk hlăm djăp čar kwar kluôm ala. Hmăi amâo mâo jăk hlăm lu mta kơ klei hdĭp mda ala ƀuôn. Phung đăo hlăm djăp anôk duah êlan bi êmuh kña, mđĭ ai lehanăn bi đru mnơ̆ng mnuă. Mâo leh lu hdră mkŏ mjing klei bi đru jing yuôm bhăn snăk mđrăm mbĭt mdrơ̆ng hŏng klei ruă tưp. Kâo lŏ wĭt dlăng kâo ƀuh phung ba anăp nao hlăm klei bi đru jing leh phung nai aê mdrao, phung knuă druh, lĭng kahan amâodah wăt phung amai adei mniê bi mkrum mnơ̆ng dhơ̆ng mơĭt kơ krĭng mâo klei ruă tưp. Kyua klei thâo bi khăp mtrŭt leh ai tiê jih jang mnuih êjai hlăm yang klei ruă tưp anei. Hmei đru mguôp mâo sa kdrêč điêt bi kah mbha klei khăp anăn hdơ̆ng găp”.

Êpul bi ala Kiă kriê Sang Aê Diê klei Mrâo mrang Jăk car Daklak  mđup brei mnŏng ti să Čŭ Êbur, ƀuôn prŏng Ƀuôn Ama Thuôt

Mbĭt hŏng jih jang klei bi đru, đru kơ phung ƀuôn sang hlăm krĭng mâo klei ruă tưp dưi găn jih klei dleh dlan wưng leh êgao, Êpul bi ala Kiă kriê Sang Aê Diê klei Mrâo mrang Jăk car Daklak mâo nanao klei mtă mtăn kơ dŭm boh Sang Aê Diê Klei Mrâo Mrang Jăk hlăm čar ngă nanao 5 mta klei phŭn bruă mdrao mgŭn mtă, lehanăn jih jang hdră mdrơ̆ng hŏng klei ruă tưp. Jih jang Hdră kơ klei kkuh mpŭ hlăm klei bi kƀĭn ăt dưi mkŏ mjing hŏng online. Phung Khua Pô Mtô, Khua kiă kriê anôk bi kƀĭn ăt mâo nanao klei mtă mtăn kơ phung đăo amâo mâo dôk bi ngi lu mnuih ôh, boh nik amâo mâo mkŏ mjing ôh klei huă ƀơ̆ng, klei bi kuôl ung mô̆. Jih jang bruă ngă ba klei tŭ dưn yuôm bhăn mơ̆ng Êpul bi ala kiă kriê Sang Aê Diê Klei Mrâo Mrang Jăk čar Daklak dưi bi lar leh ai tiê klei khăp, mđrăm mbĭt mdrơ̆ng hŏng klei ruă tưp Covid 19./.

Pô mblang: Y-Khem Niê