VOV4.Êđê - Tlam mbruê, ti Hà Nội mkŏ mjing leh knăm tŭ mă 1,5 êklăk hnơ̆ng vaccine Pfizer mơ̆ng Mi mkăp brei kơ Việt Nam hŏng hdră COVAX. Hŏng klei đru anei, Mi mñă klă ƀuăn rơ̆ng đru kơ Việt Nam msưh kdŭn klei ruă tưp Covid-19, đru rơ̆ng klei hdĭp suaih pral leh anăn êđăp ênang kơ mnuih ƀuôn sang. Hlăm knăm ba jao vaccine, k’iăng khua phŭn bruă hŏng tač êngao Đặng Hoàng Giang bi êdah klei lač jăk kơ knŭk kna Mi kyua klei đru kơ Việt Nam hlăm hdră COVAX. Hlăm wưng klei ruă tưp dôk dleh dưi ksiêm dlăng tar rŏng lăn leh anăn Việt Nam, klei đru anei jing klei yuôm bhăn êdi, đru kơ ala čar Việt Nam nao grăp knhuang bi djŏ hŏng klei msĕ aguah tlam mrâo, mbĭt anăn lŏ bi êdah klei hmăng hmưi lŏ mâo klei đru mơ̆ng dŭm ƀĭng hgŭm, amâo knŏng djŏ hjăn vaccine ƀiădah wăt kơ kdrăp yua bruă mdrao mgŭn, kah mbha klei hriăm kơ hdră krŭ wĭt bruă duh mkra leh anăn ksiêm dlăng klei ruă tưp mâo boh tŭ dưn, mơ̆ng anăn dưi mguôp kơ klei êđăp ênang tar rŏng lăn.

Y Ƀel pô mblang