VOV4.Êđê - Anôk bruă Êngĭt adiê Việt Nam (hlăm Anôk bruă ksiêm hriăm klei kreh knhâo leh anăn kdrăp mrâo Việt Nam) brei thâo: Hluê si klei hưn mthâo klă sĭt mơ̆ng Anôk bruă êdeh phiơr êngĭt adiê Nhật Bản (JAXA), hruê mđĭ mrâo kdrăp nksiêm mtŭ mlan NanoDragon “Made in Vietnam” kyua phung kreh knhâo hlăm Anôk bruă Êngĭt adiê Việt Nam, Anôk bruă kreh knhâo leh anăn Kdrăp mrâo Việt Nam mkra mjing srăng ngă hlăm hruê 7/10 kơ anăp.  Hlăm wưng mĭn tĭng mơ̆ng 7 mmông 51 mnĭt truh 7 mmông 55 mnĭt, mơ̆ng kdrăn mnah Anôk bruă êngĭt adiê Uchinoura, Nhật Bản. Anei jing kdrăp ksiêm mtŭ mlan mâo Anôk bruă êngĭt adiê Việt Nam mkra mjing. Hdră ksiêm hriăm, mkra mjing, bi kƀĭn, lông ba yua klei ksiêm kơ adiê dưi mkra mjing ti Việt Nam, mơ̆ng phung knuă druh mkra mjing ksiêm hriăm mơ̆ng Anôk bruă ksiêm hriăm êngĭt adiê Việt Nam. Kdrăp ksiêm dlăng mtŭ mlan NanoDragon dưi mđĭ kyar hŏng hdră kñăm thâo hmư̆ klei bi bi knăl mơ̆ng hô̆ pui, ba yua kơ hdră ktuê dlăng, ksiêm dlăng kdrăp hlăm êa ksĭ. Anei jing kdrăp ksiêm mtŭ mlan hlăm hdră mđĭ kyar Kdrăp ksiêm mtŭ mlan điêt “Made in Vietnam” mơ̆ng Anôk bruă ksiêm hriăm êngĭt adiê Việt Nam kñăm hlue ngă “Hdră mđĭ kyar leh anăn ba yua klei kreh knhâo leh anăn kdrăp mrâo ksiêm dlăng mtŭ mlan truh thŭn 2030” mâo Khua Knŭk kna bi mklă hrue 04/02/2021.

H Zawut pô mblang