VOV4.Êđê- Mñă klă hlăm klei bi kƀĭn aguah 15/10 kơ klei mdrơ̆ng hŏng adiê hjan mprăp jing angĭn êbŭ, Trần Quang Hoài, K’iăng Khua Anôk bruă gĭt gai ala čar kơ hdră gang mkhư̆ klei yan adiê ngă mtă kơ dŭm alŭ wăl mjêc msir mgaih boh jhat mơ̆ng adiê hjan êa lip hlăm wưng êgao leh anăn amâo brei ôh hô̆ mran ngă bruă hlăm krĭng huĭ hyưt mơ̆ng adiê hjan angĭn êbŭ. Lŏ dơ̆ng hưn răng kơ adiê hjan prŏng mơ̆ng Thưà Thiên Huế truh ti Khánh Hoà ăt msĕ mơh adiê hjan prŏng, grăm kmlă ktang ti Ninh Thuận, Bình Thuận, Lăn Dap Kngư leh anăn kwar Dhŭng, phung bi ala mtă kơ dŭm alŭ wăl lŏ dơ̆ng mjêč msir mgaih boh jhat mơ̆ng adiê hjan hlăm wưng êgao boh nik klei klưh lăn ti dŭm ktuê êlan leh anăn êlan dơ̆ng prŏng čiăng hnưm brei êdeh êdâo leh anăn êlan êdeh treng Dưr - Dhŭng lŏ wĭt ngă. Hŏng adiê hjan dơ̆ng ktang jing angĭn êbŭ, êa lip. Brei pral hâo hưn kơ dŭm gưl bruă sang čư̆ êa leh anăn mnuih ƀuôn sang gang mkhư̆, boh nik dŭm êdeh êdâo dôk  ngă bruă hlăm krĭng huĭ hyưt. Dŭm alŭ wăl brei mđing dlăng rơ̆ng êđăp ênang kơ mnuih ƀuôn sang dŭm krĭng êngăp êa, ñĕ kơ klei adiê hjan êa lip sui ngă kơ mnuih ƀuôn sang luič klei răng.

Pô mblang: H’Zawut Ƀuôn Yă