VOV4.Êđê -  Aguah anei (23/10), ti Hà Nội mkŏ mjing leh klei bi kƀĭn online kơ hdră bi đru hưn mthâo lehanăn mkŏ bruă bi mnia mblei boh mnga, kan hdang plah wah Hà Nội hŏng dŭm čar lehanăn ƀuôn prŏng. Anei jing klei bi kƀĭn tal 8, mơ̆ng Êpul kiă kriê bruă mkŏ klei bi mnia mblei boh mnga lŏ hma 970 dôk hlăm Êpul kiă kriê bruă mđĭ kyar anôk mnia mblei boh mnga, mơ̆ng Phŭn bruă lŏ hma mkŏ mjing. Kei bi kƀĭn anei bi hưn mthâo, bi trông kơ jih hdră êlan klei bi mnia mblei boh mnga hlăm ala čar lehanăn ba čhĭ kơ ala tač êngao, mtrŭt bruă bi mguôp klei duh mkra pla mjing kjăp, mđĭ boh tŭ dưn mnơ̆ng dhơ̆ng mâo. Lehanăn jing wưng pŏk êlan bi mnia mblei plah wah Hà Nội hŏng dŭm alŭ wăl, bi hgŭm klei duh mkr apla mjing, rông kan hdang plah wah dŭm alŭ wăl hŏng Hà Nội. Mâo ngă mơ̆ng mlan 9 truh ară anei, bruă anei mâo mkŏ mjing leh 7 blư̆, msĕ si: hrui blei jih boh mnga doh, siam mkăp kơ ƀuôn prŏng Hồ Chí Minh, êjai dôk hlăm klei kăm mkhư̆ kwang dar, hrui blei boh mnga mơ̆ng Lăn Dap Kngư, čhĭ kơ čar Bình Dương, hrui blei boh mnga mơ̆ng Đồng Tháp... snăn mơ̆ng hdră bi mguôp anei dưi mâo leh lu dŭm êtuh klei kuôl kă bi mnia mblei boh mnga, ƀrư̆ ƀrư̆ srăng mkŏ mjing sa êpul hgŭm bi mguôp hlăm bruă pla mjing, rông mnơ̆ng hlŏng truh kơ klei bi mnia mblei hŏng klei kjăp./.

Y Khem pô mblang