VOV4.Êđê- Hruê 26/10, phung bi ala anôk bruă kƀĭn ala srăng bi trông kơ Klei čih mkra Hdră bhiăn mkra mlih, thiăm mbŏ dŭm mta klei hlăm Hdră bhiăn Dưn yua klei mĭn mrâo. Hluê si phung bi ala: Anei jing hdră thơ̆ng kơ bruă, dôk čiăng klei kčah mtrŭn djŏ guôp hŏng dŭm klei ƀuăn rơ̆ng hlăm tar rŏng lăn mâo Việt Nam jing ala čar hgŭm, rơ̆ng kjăp klei sa ai, bi tŭ ư hŏng dŭm klei bhiăn djŏ tuôm mâo Anôk bruă kƀĭn ala ba mdah hlăm wưng êgao. Hlăm klei čih mkra hdră bhiăn, thiăm mbŏ Hdră bhiăn Dưn yua klei mĭn mrâo tal anei kčah mtrŭn: Tơdah klei čih mâo pô čih mkra mă asăp, mă rup čiăng čhĭ, ƀiădah dŭm êpul bruă, mnuih ba yua klei mă asăp, mă rup dŭm klei čih mkra anăn hŏng mta kñăm čiăng čhĭ, amâo akâo pô čih mkra phŭn ăt tla prăk klei mĭn mrâo kơ pô čih mkra phŭn anei. Phung bi ala lač, klei čih mkra hdră bhiăn brei mkra mlih hluê hdră mtrŭt mđĭ hdră ngă bruă mrâo, pral kdal, djŏ guôp hŏng dŭm boh tŭ dưn hdră tuh tia 4.0 hluê hdră mđĭ klei ba yua lehanăn hluê ngă klei dưi dưn yua klei mĭn mrâo, đru kơ hdră anei ƀrư̆ hruê ƀrư̆ jĕ giăm hŏng klei dôk mâo lehanăn hluê ngă hdră hdră bhiăn hlăm tar rŏng lăn./.

                                                    Pô mblang: H’Nêč Êñuôl