VOV4.Êđê- Ti čar Lâm Đồng, klei ruă tưp Covid-19 dưi ksiêm dlăng leh, mâo đa đa mnơ̆ng dhơ̆ng msĕ si mnga, boh kroh mâo ênoh kčưm đĭ leh, ƀĭng ngă lŏ hma ti Đà Lạt dôk kñăm krŭ wĭt klei ngă bruă knuă.

                 Leh sa wưng dôk ñăt kriêp, mdei pla mjing kyua ênoh čhĭ dŭm mta mnơ̆ng lŏ hma trŭn ênoh, luič jih prăk mnga, lu đang pla djam – mnga ti Đà Lạt lehanăn dŭm krĭng djiêu gah mơ̆ng čar Lâm Đồng mphŭn mkŏ wĭt hdră pla mjing, prăl rah pla čiăng mkăp kơ klei čiăng blei yua hlăm wăl anôk mnia mblei. Nguyễn Thị Thu, ti ƀuôn hgŭm 8, ƀuôn prŏng Đà Lạt brei thâo, kyua klei ruă tưp ƀrư̆ dưi ksiêm dlăng, hdră dŭ mdiăng mnơ̆ng dhơ̆ng găl ênưih hĭn kyua anăn dŭm mta mnơ̆ng lŏ hma đĭ leh ênoh, hlăm anăn ênoh čhĭ djam mtam, salat đĭ lu mkă hŏng mkă yang đar. Kyua anăn ñu mbĭt hŏng lu ƀĭng ngă lŏ hma mkăn dôk mjêč lŏ mkŏ wĭt bruă pla mjing kñăm mkăp djam kơ phung ghan mnia:

“Mrâo êgao, amâo lŏ dôk djam mtam ôh, salat đĭ ênoh čhĭ lu êdi truh 1.000 prăk/phŭn salat. Ară anei ênoh đĭ mơ̆ng 600 – 800 prăk/phŭn mkă hŏng hruê ka bluh mâo klei ruă Covid 19. Dŭm mlan êgao, ƀĭng ngă lŏ hma amâo đei pla ôh kyua luič jih prăk mnga hlăm gưl pla êlâo lehanăn amâo dưi ba čhĭ, ară anei ênoh čhĭ đĭ amâo lŏ dôk djam lĕ. Dlăng kluôm, ênoh čhĭ djam hlăk đĭ, ƀĭng ngă lŏ hma dôk mđing lehanăn hơ̆k kdơ̆k lŏ pla mjing”.

Mnơ̆ng dhơ̆ng lŏ hma đĭ ênoh, mnuih ƀuôn sang gĭr kriê dlăng đang mnga cúc čiăng mkăp kơ anôk ba čhĭ

Amâo djŏ knŏng djam mtam, mnuih pla mnga cúc ti Đà Lạt ăt hơ̆k kyua ênoh čhĭ mnga cúc đĭ truh 30 êbâo/čăp mnga cúc lưới, 15 êbâo prăk/čăp mnga cúc msĕ yang đar. Hŏng ênoh anei, grăp sao pla mnga cúc ƀĭng ngă lŏ hma hrui mâo prăk mnga truh 40 êklăk prăk. Hluê si Nguyễn Đình Thuận, ti ƀuôn hgŭm 7, ƀuôn prŏng Đà Lạt, năng ai kyua sa wưng mdei amâo pla mjing, hnơ̆ng mkăp amâo djăp ngă leh ênoh čhĭ dŭm mta mnơ̆ng lŏ hma đĭ. Khădah thâo mâo lu ƀĭng ngă lŏ hma dôk duh bi liê pla mjing, klă klơ̆ng anôk hrui blei hlăm wưng ti anăp srăng luč klei bi knar, huĭ srăng bluh mâo klei amâo jăk, ƀiădah hŏng hdră ƀrư̆ ƀrư̆ dưi ksiêm dlăng klei ruă tưp msĕ si ară anei, ñu čang hmăng bruă pla mjing srăng ba wĭt boh tŭ dưn hlăm yan ti anăp. Nguyễn Đình Thuận, brei thâo:

“Dlăng kluôm ênoh čhĭ mnga cúc msĕ ară anei snăn ƀĭng ngă lŏ hma mâo prăk mnga leh. Thŭn êlâo, hlăm wưng anei mnga cúc mâo ênoh 40 êbâo prăk, thŭn anei kyua Covid 19 trŭn leh. Wăl anôk mnia mblei ară anei pô amâo thâo êlâo ôh, ară anei pô đang war mnga cúc đuič čhĭ mâo ênoh bi dŭm mta mnga mkăn buč hwiê jih.

Dưi thâo, čiăng đru kơ ƀĭng ngă lŏ hma, anôk bruă duh mkra hrui blei mnơ̆ng lŏ hma, anôk bruă lŏ hma Lâm Đồng hlăk mtrŭt mđĭ mbah hâo hưn bruă mnia mblei điện tử “Mnơ̆ng lŏ hma čar Lâm Đồng” wưng thŭn 2021-2025. Hluê anăn, dŭm mta mnơ̆ng lŏ hma truh yan amâo dah dơ̆ng mprăp hrui êmiêt srăng dưi hâo hưn hlăm hla pŏk web anei kñăm mđĭ klei bi hgŭm hlăm bruă mkăp mnơ̆g dhơ̆ng, đru bi h’ĭt anôk hrui blei mnơ̆ng lŏ hma kơ mnuih ƀuôn sang./.

                                                    Pô mblang: H’Nêč Êñuôl