VOV4.Êđê-Leh Knŭk kna mâo Hdră mtrŭn 128 kơ klei mdrơ̆ng êđăp ênang, mbruă, ktuê dlăng tŭ dưn klei ruă Covid-19, lu anôk bruă mnia blei ti dŭm čar nah Dhŭng lŏ wĭt ngă bruă snăn mnuih mă bruă dŭm čar Lăn Dap Kngư ăt mphŭn lŏ wĭt mă bruă. Ti ktuê êlan dơ̆ng prŏng mrô 14, dŭm hruê giăm anei mâo lu êpul mgăt êdeh p’phŭt lŏ wĭt nao ti dŭm čar nah Dhŭng, lŏ wĭt mă bruă hŏng lu klei čang hmăng leh dŭm klei rŭng răng mâo anôk bruă duh mkra msir mgaih.

Leh êbeh 1 hruê kăm wĭt ti sang kñăm gang mkhư̆ klei ruă tưp ti kdriêk Čư̆ Pưh, čar Gia Lai, ayŏng Nguyễn Minh Khánh lehanăn ƀĭng găp giăm 20 čô lŏ bi jak wĭt ti čar Bình Dương mă bruă. Hlăm wưng gang mkhư̆ klei ruă tưp, ayŏng Khánh tlŏ leh sa aruăt vaccine gang mkhư̆ Covid 19 lehanăn êlâo kơ nao dưi ksiêm dlăng kman bi mklă amâo djŏ klei ruă Covid 19, dưi găn ti dŭm anôk gak răng mơ̆ng čar Dak Lak, Dak Nông. Ayŏng Khánh mă bruă ti sa anôk bruă kăp pŭ mnơ̆ng dhơ̆ng, prak mlan kah knar êlâo adih 6,5 êklăk prăk. Leh wĭt mă bruă, anôk bruă ƀuăn srăng mđĭ prăk mlan truh 8,5 êklăk prăk, kyua anăn ayŏng mprăp lŏ nao mă bruă lehanăn klei huĭ hyưt kơ klei ruă ăt dul mơh hlăk anôk bruă ƀuăn srăng mkŏ dăp anôk dôk 3 tinei mtam kơ mnuih mă bruă, rơ̆ng kjăp klei êđăp ênang:

  Kâo pŭ mnơ̆ng dhơ̆ng, ƀêñ kĕo, êa mmih. Mŭt tinăn srăng ngă bruă 3 tinăn mtam, prăk mlan 8,5 êklăk prăk. Pô hlŏng dôk tinei mtam amâo đei huĭ ôh kơ klei ruă tưp, pô dôk hlăm hjiê lah, amâo mâo mnuih mŭt kbiă, amâo bi tuôm hŏng arăng ôh.

Mnuih ƀuôn sang wĭt mă brưa hŏng lu klei čang hmăng

Ăt ti ktuê êlan giăm 30 čô, mâo ƀĭng găp, ayŏng adei găp djuê nao wĭt kơ čar Đồng Nai mă bruă, ayŏng Y Trinh Buôn Yă, ti wăl krah Ƀuôn Hô, čar Dak Lak brei thâo, 3 mlan êlâo ayŏng wĭt ti sang kñăm gang mkhư̆ klei ruă tưp, kyua dleh dlan êdi amâo mâo bruă mă. Myun mơh anôk bruă mkra mjing hdruôm jơ̆ng, jep anôk ayŏng Y Trinh mă bruă đru leh kơ grăp čô mâo 1,5 êklăk prăk sa mlan hlăm wưng mdei bruă. Anei ăt jing boh kdrŭt mnuih mă bruă msĕ si ayŏng lŏ wĭt ngă bruă leh Knŭk kna mâo Hdră mtrŭn mrô 128 kơ hdră hdĭp êđăp ênang, ksiêm dlăng tŭ dưn klei ruă Covid 19, anôk bruă duh mkra lŏ pŏk ƀăng. Mđing uêñ prŏng êdi mơ̆ng ayŏng Y Trinh jing ka dưi tlŏ vaccine, ƀiădah anôk bruă duh mkra ƀuăn srăng hnưm msir mghaih klei anei kơ jih jang mnuih mă bruă”

  “Kâo jing mnuih mă bruă mkra mjing hdruôm jơ̆ng, jep guôk. Anôk bruă iêu lŏ wĭt mă bruă snăn brei tlŏ vaccine êlâo kơh mă. Anôk bruă ăt đru lehanăn mâo klei ƀuăn rơ̆ng leh mơh.

  Hlăk klei ruă tưp dôk mâo dleh dưi ksiêm dlăng, anôk bruă duh mkra kđăl ƀăng, mnuih mă bruă krĭng Lăn dap kngư bi kluh đuê̆ wĭt mơ̆ng dŭm čar kwar Dhŭng gang mkhư̆ klei ruă tưp. Leh knŭk kna mâo hdră mtrŭn kơ hdră hdĭp êđăp ênang, ksiêm dlăng tŭ dưn klei ruă Covid 19, lu anôk bruă duh mkra lŏ wĭt ngă bruă snăn mnuih mă bruă ti dŭm čar krĭng Lăn dap kngư ăt mprăp lŏ nao mă bruă. Boh sĭt, grăp hruê mâo leh giăm 1 êbâo čô mnuih lŏ wĭt kơ kwar Dhŭng. Anei jing sa klei bi êdah jăk kñăm lŏ krŭ wĭt bruă duh mkra ti krĭng phŭn kwar Dhŭng êdei kơ klei ruă tưp./.

                                                    Pô mblang: H’Nêč Êñuôl