VOV4.Êđê - Klei bi kƀĭn Êpul hgŭm bruă knuă hlăm yang ƀuôn ASEAN tal 10 hŏng anăn “Mnuih mă bruă ksiêm dlăng yang ƀuôn hlăm ASEAN jing pô phŭn hlăm hdră lŏ krŭ wĭt leh wưng bluh mâo klei ruă Covid 19” dưi mkŏ mjing aguah hruê 21/9 hluê hdră online. Anei jing bruă mâo Phŭn bruă Mnuih ngă bruă, kahan êka êkeh lehanăn yang ƀuôn ala čar drei – hŏng bruă klam jing Khua kiă kriê Êpul hgŭm dŭm bruă hlăm yang ƀuôn mơ̆ng ASEAN wưng thŭn 2020-2021 mkŏ mjing. Klei bi kƀĭn dưi mkŏ mjing hluê hdră online mâo klei nao hgŭm mơ̆ng phung khua êmua, phung khua kiă kriê anôk bruă bi hgŭm mơ̆ng ASEAN. Hŏng bruă klam jing Khua kiă kriê Êpul hgŭm dŭm bruă hlăm yang ƀuôn mơ̆ng ASEAN wưng thŭn 2020-2021, Việt Nam mâo leh klei bi hgŭm kjăp hŏng dŭm ala čar hgŭm hlăm ASEAN, Keh Hđeh êlăk mơ̆ng Êpul hgŭm lu ala čar lehanăn dŭm ƀĭng hgŭm  djŏ tuôm kñăm mtrŭt mđĭ bruă mkra lehanăn bi leh Hdră hluê ngă Klei hưn mthâo Hà Nội kơ bruă mtrŭt mđĭ hdră bruă yang ƀuôn mđing truh kơ Êpul êya ASEAN hgŭm mguôp lehanăn pral kdal čiăng ba mdah kơ Klei bi kƀĭn gưl dlông ASEAN tal 38 mkŏ mjing hlăm mlan 10 kơ anăp. Ti anôk bi kƀĭn, bi ala dŭm anôk bruă mơ̆ng ASEAN lehanăn ƀĭng hgŭm, hrăm mbĭt kah mbha lehanăn bi trông klei mĭn kơ bruă klam mơ̆ng hdră yang ƀuôn hlăm hdră gang mkhư̆ lehanăn lŏ krŭ wĭt ala čar, krĭng wăl leh wưng bluh mâo klei ruă Covid 19, hlăm anăn mđing hlăm bruă kriê dlăng klei suaih pral lehanăn klei tŭ dưn kơ yang ƀuôn.

Hlăm hdră mơ̆ng Klei bi kƀĭn mkŏ mjing leh Knăm bi hdơr 10 thŭn mkŏ mjing Êpul hgŭm dŭm bruă hlăm yang ƀuôn mơ̆ng ASEAN (2011-2021)./.

H Nêc pô mblang