VOV4.Êđê- Mŭt hlăm wưng hrui êmiêt phŭn hlăm yan 2021, ênoh čhĭ mkai trŭn hrŏ êdi dôk ti gŭ 3 êbâo prăk/kg. Klei anei ngă kơ mnuih pla mkai ti Gia Lai luič liê jih hruê ai mă bruă, luič wăt prăk duh bi liê. Ară anei, ti čar Gia Lai mâo êbeh 1.000 ha mkai, lu ti dŭm kdriêk: Krông Pa, Phú Thiện, Ia Pa, Čư̆ Prŏng… Yan mkai kreh mâo hlăm 3 mlan knhal jih thŭn, mnuih ƀuôn sang mdơ̆ng pưk ti đang kriê dlăng, hrui êmiêt suaĭ êmăn. Thŭn anei, ênoh čhĭ mkai trŭn, ngă kơ klei mă bruă duh bi liê lehanăn hnư hrui wĭt mơ̆ng mnuih ƀuôn sang amâo năng ôh. Nguyễn Tuấn Anh – K’iăng khua anôk bruă sang čư̆ êa să Ia Mơr, kdriêk Čư̆ Prŏng brei thâo: Wưng anei thŭn êlâo ênoh čhĭ mơ̆ng 6000 - 7000 prăk/ 1kg anăn mâo prăk mnga. Ƀiădah thŭn anei, ênoh knŏng mâo mơ̆ng 2.500 - 3.000 prăk/1 kg snăn grăp ha, luič liê truh dŭm pluh êklăk prăk, ngă kơ mnuih ƀuôn sang tuôm hŏng lu klei dlan dlan, dôk čiăng êdi kơ klei đru./.

                                                    Pô mblang: H’Nêč Êñuôl