VOV4.Êđê- Mŭt hlăm wưng hrui êmiêt phŭn yan thŭn 2021, ênoh čhĭ mkai trŭn êdi, knŏng dôk ti gŭ 3 êbâo prăk/kg. Klei anei ngă kơ mnuih ƀuôn sang mă bruă pla mkai ti Gia Lai luič liê lu êdi, luič jih prăk duh bi liê.

15 thŭn mưn lăn pla mkai ti să Ia Mơr, kdriêk Čư̆ Prông, čar Gialai, Bùi Hữu Phước 46 thŭn, ti să Bình Nghi, kdriêk Tây Sơn, čar Bình Định brei thâo, ka tuôm mâo ôh ênoh čhĭ mkai êlưih hĭn msĕ si ară anei. Thŭn anei, ênoh čhĭ hbâo pruê, lehanăn mnơ̆ng kơ bruă pla mjing đĭ yuôm, čiăng duh bi liê pla 2 ha mkai, ñu bi liê truh 100 êklăk prăk, lŏ dơ̆ng čan knơ̆ng prăk 60 êklăk prăk. Akŏ yan, ênoh čhĭ mkai jing 7 êbâo prăk/kg, snăn mkai ñu ka mâo hrui pĕ ôh. Krah yan, ênoh čhĭ trŭn êlưih bhiâo riâo rit truh 3 êbâo prăk/kg, sĭt nik amâo mâo mnga ôh, Phước ka hrui pĕ ôh. Ƀiădah ênoh čhĭ ka yŏng amâo mâo đĭ, hjan mklăk yan nga kơ mkai dôk hlăm đang kđang hĕ, snăn bi tiŏ êran čhĭ hŏng ênoh mil 2 êbâo 500 prăk/kg:

“Mâo 7 êbâo prăk/kg jing akŏ yan. Ară anei China kđăl ƀăng jang leh, amâo lŏ mâo êlan čhĭ mnia ôh, snăn ênoh čhĭ mkai trŭn mtam truh 2.500 prăk/kg. Sa sao luič truh 6 êklăk prăk. Luič liê kyuanăn amâo mâo ôh prăk pioh lŏ duh kơ yan êdei”.

Amai Toán ti đang mkai ti să Ia Mơr

Msĕ hŏng Phước, 3 mlan êgao, ung mô̆ Văn Thị Toán 39 thŭn, ăt mơĭt 2 čô anak dôk ti ƀuôn sang ti Bình Định, đĭ hriê kơ să Ia Mơr, kdriêk Čư̆ Prông, čar Gialai čiăng mưn lăn pla mkai. Truh yan leh ruĕ hrui êmiêt kơh mâo wĭt ƀơ̆ng Tết hŏng găp djuê, ƀiădah ung mô̆ amai Toán dôk ênguôt kyua ênoh čhĭ mkai amâo lŏ yuôm ôh:

“Kâo bi liê kơ sa ha jing 160 êklăk prăk, mưn mă bruă ară anei yuôm mơh, phung pla mjing čhĭ mă knŏng 3 êbâo prăk/kg jing luič liê êdi, luič truh 40 êklăk prăk/ha. Mă bruă suăi êmăn dua ung mô̆, phưi anak aneh kơ sang, hriê kơ anei mă bruă ƀiădah čhĭ mnia amâo mâo yuôm ôh”.

Ƀĭng ngă lŏ hma mdơ̆ng sang čhiăm, đih đăm ti đang mkai hlăm 3 mlan čiăng kriê dlăng mkai

Ară anei, ti čar Gialai mâo leh êbeh 1 êbâo ha đang mkai, lu jing ti dŭm kdriêk Krông Pa, Phú Thiện, Ia Pa, Čư̆ Prông... Yan pla mkai knŏng hlăm 3 mlan knhal jih thŭn, phung pla mkai mdơ̆ng pưk hlăm đang dlăng kriê mă bruă knuă suăi êmăn. Thŭn anei, ênoh čhĭ amâo lŏ yuôm mtam, snăn hŏng klei suăi êmăn mă bruă amâo mâo dưi tla hnô hŏng klei năng ôh. Nguyễn Tuấn Anh, k’iăng khua sa Ia Mơr, kdriêk Čư̆ Prông brei thâo:

“Ênoh dah msĕ hŏng thŭn dih mơ̆ng 6 êbâo truh 7 êbâo prăk/kg snăn kơh phung pla mjing mâo mnga. Truh ară anei ênoh čhĭ mil 2 êbâo 500 truh 3 êbâo prăk/kg, ƀaih phung pla mjing tuh lu ênoh bi liê kơ bruă knuă, snăn sa ha luič hĕ dŭm pluh êklăk prăk mtam. Snăn jing dleh dlan êdi yơh hŏng phung ƀuôn sang, čang hmăng srăng mâo dŭm hdră êlan đru mdul sa kdrêč kơ phung pla mjing”./.

Pô mblang: Y-Khem Niê