VOV4.Êđê - Klei bi kƀĭn tal 4 mơ̆ng Dhar bruă kƀĭn ala mphŭn pŏk hlăm aguah anei 11/10. Mkŏ mjing hlăm 4 hruê, klei bi kƀĭn srăng brei klei blŭ hlăm lu mta phŭn yuôm bhăn, hlăm anăn mâo bruă čuăn mkă ba yua lăn ala čar wưng 2021-2030, hnơ̆ng trah dlăng 2050 leh anăn hdră kčah ba yua lăn 5 thŭn (2021-2025).  Kơ bruă mkŏ mjing hdră bhiăn, Dhar bruă kƀĭn ala brei klei blŭ mguôp kơ hră čih Hdră bhiăn mlih mrâo, mbŏ Hră mơar - anăn hnơ̆ng kčah ksiêm yap ala čar mơ̆ng Hdră bhiăn ksiêm yap; dŭm hră čih Hdră mtrŭn kơ klei lông ba yua dŭm klei bhiăn, hdră êlan mđĭ kyar dŭm čar, ƀuôn prŏng Hải Phòng, Nghệ An, Thừa Thiên - Huế. Kơ dŭm bruă duh mkra- ala ƀuôn leh anăn prăk knŭk kna, Dhar bruă kƀĭn ala brei klei blŭ kơ klei hưn mdah mơ̆ng Knŭk kna kơ bruă kriê dlăng leh anăn ba yua keh prăk ênua mdrao mgŭn thŭn 2020, 2 thŭn 2019-2020 hluê ngă Hdră mtrŭn mrô 68/2013/QH13 kơ klei mđĭ bruă hluê ngă hdră êlan, hdră bhiăn kơ prăk ênua mdrao mgŭn, mđing kơ prăk ênua mdrao mgŭn kơ jih jang mnuih ƀuôn sang, klei tŭ hluê ngă hdră kčah mđĭ kyar bruă duh mkra- ala ƀuôn leh anăn hdră mĭn tĭng prăk knŭk kna thŭn 2021, hdră kčah mđĭ kyar bruă duh mkra - ala ƀuôn thŭn 2022, hdră mĭn tĭng prăk knŭk kna leh anăn hdră mbha prăk knŭk kna gưl dlông 2022…

H Zawut pô mblang