VOV4.Êđê- Hruê 19/12, ti ƀuôn prŏng Pleiku, čar Gia Lai, Phŭn bruă Lŏ hma mđĭ kyar krĭng ƀuôn sang mbĭt hŏng dŭm čar krĭng Lăn dap kngư mkŏ mjing leh “Klei bi kƀĭn mtrŭt mđĭ bruă duh mkra pla mjing kñăm mkra mđĭ kyar h’ĭt kjăp anôk bruă kphê Lăn dap kngư”. Ala čar drei ară anei mâo giăm 700 êbâo ha kphê, hnơ̆ng mâo êbeh 1,76 êklăk ton/thŭn, jing ala čar ba čhĭ kphê lu tal 2 tar rŏng lăn. Hlăm anăn, 92% ênhă lehanăn 95% hnơ̆ng mâo dưi pla mjing ti dŭm čar krĭng Lăn dap kngư.

Ti anôk bi kƀĭn trông, phung bi ala akâo kơ knŭk kna lehanăn dŭm phŭn, dhar bruă mjing klei găl đru kơ anôk bruă duh mkra mkŏ mjing anăn knăl lehanăn bi mklă hnơ̆ng tŭ jăk kphê tar rŏng lăn, boh nik ti wăl anôk mnia mblei EU, Mi, Japon. Khua phŭn bruă Lŏ hma mđĭ kyar krĭng ƀuôn sang Lê Minh Hoan brei thâo, anăp truh, Phŭn bruă srăng čih mkra sa hdră kčah hjăn kơ bruă ba čhĭ mnơ̆ng lŏ hma truh kơ wăl anôk mnia mblei Ơrôp, kñăm bi mklă hdră ba kphê lehanăn dŭm mta mnơ̆ng mơ̆ng lŏ hma Việt Nam truh kơ wăl anôk mnia mblei pprŏng. Dŭm anôk bruă duh mkra brei mkŏ mjing êpul hgŭm phung ba čhĭ kphê kơ ala tač êngao kñăm thâo klă klei čiăng lehanăn klei kčah mtrŭn djŏ hdră bhiăn mơ̆ng dŭm wăl anôk mnia mblei./.

Pô mblang: H’Nêč Êñuôl