VOV4.Êđê - Anôk bruă pui kmlă Dak Lak mrâo mkŏ mjing knăm jao 4 boh sang khăp čiăng kơ dŭm gŏ êsei dleh dlan ti să Êa Ktur, kdriêk Čư̆ Kuiñ, să Čư̆ Kpô, kdriêk Krông Ƀŭk lehanăn să Êa Bông, kdriêk Krông Ana. Grăp boh sang mâo anôk bruă đru 60 êklăk prăk, gŏ sang lehanăn anôk bruă djŏ tuôm ti alŭ wăl lŏ đru thiăm prăk kăk lehanăn hruê ai mă bruă lŏ mkra bi msiam pưk sang hluê si klei čiăng.

Mŭt dôk hlăm sang mrâo, amai H’Nuyn Êban, ti ƀuôn Jŭng A, să Êa Ktưr, kdriêk Čư̆ Kuiñ mgei ai tiê lač: Kâo m’ak êdi kyua dơ̆ng mơ̆ng hruê anei kâo mâo sang mrâo dôk leh. Êlâo adih gŏ sang kâo dôk hlăm sang tĭ ƀrôč, ară anei kâo amâo lŏ mđing uêñ ôh grăp blư̆ adiê hjan amâo dah mđiă. Kaoa lač jăk kơ anôk bruă đru rŭ mdơ̆ng leh sang kơ gŏ sag kâo.

Trần Văn Thuận, Khua anôk bruă pui kmlă Dak Lak brei thâo, mtrŭt mđĭ hdră đru kơ yang ƀuôn ƀri bi hdơr 45 thŭn hruê mkŏ mjing êpul êya, hlăm thŭn anei, mbĭt hŏng hdră mđup brei mnơ̆ng kơ êpul ba anăp nao hlăm hdră gang mkhư̆ klei ruă tưp, đru kơ keh gang mkhư̆ Covid 19..., anôk bruă lŏ đru êbeh 400 êklăk prăk čiăng rŭ mdơ̆ng 6 boh sang khăp čiăng đru kơ gŏ sang dleh dlan:Mđrĭng hŏng hdră duh mkra mnia mblei snăn hdră hdơr knga tla ai ăt mâo anôk bruă mđing mrô sa. Hdră mâo anôk bruă kčah mtrŭn jing gĭr bi leh bruă rŭ mdơ̆ng sang êlâo kơ yan hjan êa lip. Snăn hruê anei dưi ngă mbĭt anăn ba jao leh dŭm boh sang, kâo mơak mơh kyua mâo leh sang mrâo kơ digơ̆, anei ăt jing klei m’ak mơ̆ng anôk bruă hmei dưi ngă leh bruă djŏ si hdră kčah mtrŭn./.

H Nêc pô mblang