VOV4.Êđê - Ti anăp klei ruă tưp dleh ktuê dlăng, čar Dak Lak mkŏ mjing leh Sang êa drao jing jai mrô 2 (hnơ̆ng 1.500 jhưng đih mdrao, ti Sang hră bruă kđi čar čar Dak Lak, mrô 1 êlan Nguyễn Lương Bằng, ƀuôn hgŭm Tân Hoà, ƀuôn prŏng Ƀuôn Ama Thuôt pioh mdrao kơ mnuih ruă Covid-19.

Rơ̆ng kơ sang êa drao pral ngă bruă, hlăm 2 hruê 31/10 leh anăn 1/11, knơ̆ng bruă pui kmlă Dak Lak dăp leh êpul mă bruă mjêč, mkra mđĭ, mkŏ dăp kdrăp pui kmlă yua hlăm Sang êa drao jing jai mrô 2. Anôk bruă mkra mđĭ kdrăp pui kmlă hlăm sang, bi mlih klei pui nah gŭ, mđĭ hnơ̆ng ngă bruă anôk mđĭ mtrŭn pui kmlă truh 400kVA leh anăn mprăp thiăm 1 phŭn mkăp. Truh 5 mmông tlam hruê 1/11, bruă mkăp pui kmlă kơ Sang êa drao dưi bi leh, mprăp djăp ênŭm dŭm klei găl čiăng kơ Sang êa drao tŭ jum mnuih ruă.

H Zawut pô mblang