VOV4.Êđê- Lŏ čuê dŭm bruă ngă ti Mi, Khua lăn čar Nguyễn Xuân Phúc nao čuă leh knơ̆ng bruă Pfizer, jing sa hlăm dŭm knơ̆ng bruă mkra mjing êa drao kdlưn hĭn dlông rŏng lăn. Khua lăn čar yap yuôm bhăn kyua knơ̆ng bruă jao leh kơ ala čar Việt Nam 2,8 êklăk hnơ̆ng vaccine tui si klei kuôl kă hŏng ala čar Việt Nam, mñă klă, bruă mkăp brei ênŭm hnơ̆ng vaccine jing klei yuôm bhăn kơ klei hdĭp, klei suah pral anak mnuih leh anăn rơ̆ng klei êđăp ênang bruă duh mkra ala ƀuôn. Khua lăn čar lač kơ knơ̆ng bruă mđing hĭn leh anăn mtrŭt mđĭ ênoh vaccine Pfizer kơ ala čar Việt Nam hnưm hĭn hlăm mlan 9 leh anăn jao jih hlăm thŭn anei tui si klei kuôl kă 31 êklăk hnơ̆ng vaccine 2 tĭng kuôl kă leh, hnưm bi klă hdră ba jao vaccine tlŏ kơ phung hđeh mơ̆ng 12 truh kơ 18 thŭn. Pfizer ƀuăn rơ̆ng hlăm thŭn anei srăng ba jao ênŭm 31 êklăk hnơ̆ng Việt Nam kơ ala čar Việt Nam leh anăn mâo 20 êklăk hnơ̆ng vaccine kơ phung hđeh leh knơ̆ng bruă Pfzer mâo ênŭm klei čih pioh kơ boh tŭ dưn leh anăn klei êđăp ênang mơ̆ng vaccine.

Pô mblang: Y-Ƀel Êban