VOV4.Êđê - Hruê 15/10, Đại tướng Tô Lâm, Khua phŭn bruă kahan ksiêm gĭr gai leh knăm bi tuôm hŏng 400 čô knuă druh tiŏ nao ngă kahan ksiêm să krĭng knông lăn, mđing kơ dŭm anôk dôk dleh dưi ksiêm dlăng hlăm bruă răng mgang klei êđăp ênang. Hluê ngă hdră mđĭ hĭn êpul nao kdơ̆ng mblah, mđing truh kơ alŭ wăl nah gŭ, lŏ mkŏ dp êpul knuă druh ti dŭm gưl hlăm Anôk bruă kahan ksiêm lehanăn mkŏ mjing êpul kahan ksiêm să knhăk, Phŭn bruă kahan ksiêm ba mdah leh hdră kčah ba nao phung knuă druh dôk mă bruă ti dŭm êpul êya bruă hlăm Phŭn bruă kahan ksiêm nao ngă kahan ksiêm să ti krĭng knông lăn dôk dleh ksiêm dlăng klei êđăp ênang.

Blŭ hrăm ti knăm anei, Khua phŭn bruă kahan ksiêm Tô Lâm mñă klă, hdră ba nao phung knuă druh amâo djŏ knŏng mđĭ hĭn, thiăm mbŏ êpul kahan să ti dŭm alŭ wăl nah gŭ ƀiădah lŏ mjing klei găl čiăng kơ phung knuă druh dưi nao ksiêm hriăm, mjuăt pô lehanăn thiăm mbŏ klei thâo hlăm klei mâo sĭt. Khua phŭn bruă mtă kơ phung knuă druh dưi ba nao ngă kahan ksiêm să krĭng knông lăn brei pral msir mghaih klei dleh dlan, hnưm ñŭ kma hŏng wăl anôk ngă bruă mrâo lehanăn kčưm hluê ngă, bi leh jih bruă klam mâo kčah jao./.

H Nêč pô mblang