VOV4.Êđê -  Aguah mbruê, klei kƀĭn trông gưl dlông tal 4 êpul khua bruă Đảng gưl dlông dưi pŏk kčưm ti ƀuôn prŏng phŭn Hà Nội, khua gĭt gai Đảng Nguyễn Phú Trọng gĭt gai leh anăn blŭ pŏk kčưm yuôm bhăn hlăm klei kƀĭn anei. Klei kƀĭn trông tal anei srăng bi trông, brei klei blŭ kơ bruă gang mkhư̆ klei ruă tưp Covid-19 leh anăn klei mĭn, bruă ngă kơ bruă gang mkhư̆ klei ruă tưp hlăm ênuk mrâo, bruă duh mkra ala ƀuôn thŭn 2021, hdră mkăp mđĭ kyar bruă duh mkra ala ƀuôn thŭn 2022 leh anăn hdră êlan ngăn prăk - ngăn prăk knŭk kna wưng tlâo thŭn mơ̆ng 2022-2024, klei mĭn bi kdung klei mlih hdră êlan tla prăk mlan tui si hdră mtrŭn mrô 27-NQ/TW mơ̆ng klei kƀĭn trông gưl dlông tal 7 gưl 12 leh anăn dŭm boh klei yuôm bhăn mkăn. Lač klă, dŭm mta phŭn hưn mdah hŏng klei kƀĭn trông gưl dlông tal anei jing dŭm boh klei yuôm bhăn hŏng bruă ngă tu jing hdră mtrŭn hlăm klei kƀĭn kluôm tal 13 mơ̆ng Đảng, mâo wăt bruă klam mđĭ kyar bruă duh mkra ala ƀuôn leh anăn ngă dŭm bruă klam phŭn jing mkŏ mjing, bi mlih hdră mă bruă hlăm Đảng, khua gĭt gai Đảng Nguyễn Phú Trọng lŏ sa blư̆ mñă klă, Gưl dlông srăng bi lar ai tiê bruă klam, ksiêm duah, hur har hlăm klei bi trông, brei klei blŭ čiăng dưi bi leh dŭm klei hưn mdah, hdră êlan, hdră mkăp dŭm hdră mtrŭn, klei bi klă mơ̆ng gưl dlông leh anăn ksiêm dlăng, bi klă ti knhal tuič klei kƀĭn. Klei kƀĭn trông anei mĭn tĭng srăng mă bruă truh kơ hruê 7/10.

Y Ƀel pô mblang