VOV4.Êđê- Aguah mbrue (18/10) Êpul gơ̆ng bruă ƀuôn sang ƀuôn prŏng Hồ chí Minh gưl 10 pŏk leh klei bi kƀĭn tal 3. Khua bruă Đảng ƀuôn prŏng Hồ Chí Minh Nguyễn Văn Nên nao ti anôk bi kƀĭn. Êlâo kơ mkŏ mjing klei bi kƀĭn, phung bi ala pioh sa mnĭt bi hdơr kơ phung djiê kyua klei ruă tưp. Anei ăt jing klei bi kƀĭn yuôm bhăn čiăng ksiêm wĭt jih jang bruă mdrơ̆ng hŏng klei ruă tưp, lehanăn dŭm hdră kơrŭ wĭt bruă duh mkra. Yap truh kơ hrue 17/10, klei ruă tưp ti ƀuôn prŏng Hồ Chí Minh mâo leh klei bi mlih jăk, ênoh mnuih tưp djŏ hrŏ truh ti ênoh 3 mrô, ênoh mnuih djiê hrŏ ti ênoh 2 mrô, ênoh mâo tlŏ vaccine aruăt tal 1 kơ mnuih mơ̆ng 18 thŭn kơ dlông giăm 99%, aruăt tal dua êbeh 76%. Mbĭt hŏng jih jang ênoh leh mâo, ƀuôn prŏng ksiêm wĭt boh mơ̆ng klei ruă tưp ngă. Klei bi kƀĭn ksiêm wĭt jih jang klei duh mkra ala ƀuôn 9 mlan lehanăn bruă kơ dŭm mlan adôk hlăm thŭn, ngă bi mngač phŭn agha mơ̆ng dŭm gưl alŭ wăl, êpul êya bruă lehanăn čiăng bi mâo hdră mă bruă bi djŏ guôp./.

Pô mblang: Y-Khem Niê