VOV4.Êđê - Hlăk lu anôk bruă pui kmlă êran hŏng ai angĭn ti Lăn dap kngư tuôm hŏng lu klei dleh dlan hlăm bruă msir mghaih, čiu hnô anôk ala, mâo lu klei bi tăng mgăl, bi kuan mmiă lehanăn luič klei êđăp ênang ala ƀuôn, snăn ti kdriêk Êa Hleo, čar Dak Lak mâo leh klei tŭ jing hlăm bruă anei. Boh tŭ bruă duh mkra mơ̆ng mta bruă anei srăng hrăm mbĭt hŏng boh tŭ dưn kơ yang ƀuôn, klă mngač, mđing hmư̆, hluê ngă djŏ hdră bhiăn, anăn jing tur knơ̆ng čiăng kơ phung duh bi liê, anôk bruă sang čư̆ êa lehanăn mnuih ƀuôn sang mâo klei sa ai, đru kơ mta bruă anei ba wĭt klei tŭ dưn hlăm bruă duh mkra – ala ƀuôn, mjing tur knơ̆ng lŏ dơ̆ng jak iêu hdră duh bi liê, pŏk ngă anôk bruă pui kmlă êran hŏng ai angĭn hlăm êdei anăp, mđĭ lar klei găl mâo mơ̆ng alŭ wăl.

Sang mrâo rŭ mdơ̆ng mơ̆ng gŏ sang amai Phan Thị Hồng Phượng ti alŭ 5, să Dliê Yang, kdriêk Ea H’Leo, mâo boh taih hŏng dŭm gơ̆ng bi êran pui kmlă hŏng ai angĭn mơ̆ng hdră pui kmlă krĭng Lăn Dap Kngư knŏng dŭm êtuh met. Sang anei êlâo dih dôk hjăn păn ti čŏng čư̆ ƀiădah ară anei mâo hdră mkăp mkra mjing pui kmlă êran hŏng ai angĭn jing mâo lu klei găl. Ung mô̆ amai Phượng dưn yua klei găl anei pŏk sang čih mnia, pla lu mnga hlăm war sang leh anăn anăp sang mkăp kơ phung tuê check in, dlăng kơ klei siam pui kmlă êran hŏng ai angĭn. “Mơ̆ng hruê leh mkŏ mkra pui kmlă êran hŏng ai agĭn anei, mnuih ƀuôn sang ti alŭ 5 dưi mâo lu klei jăk găl kyua mâo êlan Petông, ka lač ôh êlâo dih mâo knŏng ƀiă mnuih, ƀiădah ară anei mâo lu tuê hriê. Diñu hriê mă rup dŭm gơ̆ng pui klă leh anăn klei siam tinei. Klei hdĭp tinei ară anei mâo lu klei mlih, kyua hdră mkăp pui kmlă anei.”

Hdră mkăp pui kmlă êran hŏng ai angĭn krĭng Lăn Dap Kngư ti să Dliê Yang, kdriêk Ea H’Leo, jing hdră pui mklă êran hŏng ai angĭn tal êlâo hĭn ti čar Dak Lak leh anăn krĭng Lăn Dăp Kngư, mơ̆ng êpul group HBRE mkŏ mjing mơ̆ng thŭn 2017. Nguyễn Hoàng Hiệp –K’iăng khua kiă kriê hdră mkăp anei brei thâo, hdră anei mâo hnơ̆ng mkra mjing pui kmlă 28,8 MW, mâo 12 gơ̆ng Turbin, djŏ tuôm hŏng bruă čiu prăk lăn ala leh anăn mnơ̆ng dhơ̆ng kơ 84 gŏ sang. Anei jing bruă dleh dlan êdi. 84 pô sang mâo klei mĭn mdê mdê. Tơdah amâo ngă jăk, si diñu srăng mâo klei lač, klei kčŭt, bi kpăk klei ngă bruă. Hŏng klei hrăm mbĭt mơ̆ng dŭm gưl bruă sang čư êa leh anăn klei gĭr tŭ, klei jăk mơ̆ng knơ̆ng bruă, dŭm anôk kpăk gun dưi ruh mgaih jih. Ară anei hdră mkăp dưi tŭ jing leh anăn mkra pui kmlă hlăm mmlan 11 thŭn 2019. Nguyễn Hoàng Hiệp lač: “Bruă sang čư êa kdriêk mkŏ mjing leh êpul đru kơ bruă čiu prăk lăn ala kơ mnuih ƀuôn sang leh anăn đru kơ knơ̆ng bruă. Êjai mmông mkŏ mjing, knơ̆ng bruă bi mguôp hŏng anôk bruă ksiêm dlăng lăn čar, kdriêk mâo dŭm hdră êlan čiu prăk kăk kơ mnuih ƀuôn sang. Jih jang mnuih ƀuôn sang dưi mâo klei čiu klă mngač, bruă sang čư êa ksiêm dlăng kơ ênoh gŏ sang mâo klei čiu anăn, ênhă lăn djŏ leh anăn mnơ̆ng dhơ̆ng mâo hlăm lăn anăn, leh anăn hưn mdah hŏng gưl bruă mâo klei dưi čiăng bi klă, ngă klei čiu prăk kơ mnuih ƀuôn sang.”

Leh klei tŭ jing mơ̆ng hdră pui kmlă êran hŏng ai angĭn krĭng Lăn Dap Kngư, kdriêk Ea H’Leo lŏ mkŏ mjing sa hdră mkăp mkăn, prŏng hĭn 14 blư̆ mkă hŏng hdră tal êlâo. Anăn jing sang mkra mjing pui kmlă êran hŏng ai angĭn Ea Nam, mơ̆ng êpul group Nam Trung duh bi liê.

Tui si Nguyễn Văn Hà – khua bruă sang čư êa kdriêk Ea Hleo, klei lông dlăng prŏng hĭn hŏng hdră mrâo jing srăng ngă jih jang bruă hŏng êbeh 11 mlan, leh anăn mkŏ mjing hlăm wưng klei ruă tưp Covid-19 dôk bluh đĭ. Mâo lu êdi klei dleh dlan, boh nik jing bruă tla prăk lăn leh anăn klei kpĭ klei hmăr ngă bruă, phung duh bi liê mâo mmông nao soh êlan, čiăng blei lăn mnuih ƀuôn sang msĕ hŏng dŭm anôk mkŏ mkra pui kmlă êran hŏng ai angĭn mkăn, kyua klei čŏng ngă bruă, klei gĭr mơ̆ng dŭm gưl bruă sang čư êa, êpul êya dưi đru leh kơ knơ̆ng bruă ruh mgaih klei kpăk gun. Anei jing klei kpăk dŭm hdră mkăp mkăn tuôm sơăi, ară anei dleh dlan dưi mgaih msir leh.

Nguyễn Văn Hà lač, čiăng mâo klei tŭ jing kơ hdră mkăp, čiăng mâo pô duh bi liê ênuah ênô, bruă sang čư êa mâo klei blŭ mbĭt hŏng bruă ngă, kjăp hŏng klei bhiăn klă mngač, ngă djŏ klei leh ƀuăn rơ̆ng. Hŏng kdriêk Ea H’Leo, anăn jing tur knơ̆ng čiăng iêo mthưr, mkŏ mkra dŭm hdră mkăp mkăn, mđing bi lar jih klei găl pui kmlă êran hŏng ai angĭn 3.000 MW hlăm alŭ wăl. “Wưng tal êlâo, mâo lu mnuih ƀuôn sang amâo bi tŭ ư ôh, kăn mâo klei bi mguôp lei. Hmei yua phung khua mduôn hlăm ƀuôn, khua ƀuôn, khua bruă Đảng nah gŭ amâo dah pô mâo klei đăo knang bi mguôp hŏng phung knuă duh hlăm să, khua gĭt gai hlăm kdiêk nao blŭ hrăm, ktrâo lač kơ mnuih ƀuôn sang ya dŏ mâo leh anăn ya dŏ luič mơ̆ng hdră êlan prŏng hlăm čar, kdriêk. Leh klei hlăk mblang, mnuih ƀuôn sang thâo săng leh anăn tŭ ư hŏng hdră anei. Ti kdriêk Ea H’Leo mơ̆ng êlâo ka tuôm mâo ôh klei mjhĭk mtŭl plah wah mnuih ƀuôn sang hŏng knơ̆ng bruă duh bi liê. Anăn jing klei gĭr mơ̆ng hmei, mơ̆ng klei anei dưi đru mâo klei tŭ jing kơ hdră mkăp mkra mjing pui kmlă êran hŏng ai angĭn hlăm alŭ wăl.”

Hruê anei, kdriêk Ea Hleo dưi bi êdah leh kơhưm jing sa kđông mkra mjing pui mklă êran hŏng ai angĭn alŭ wăl krĭng Lăn Dap Kngư hŏng giăm 100 gơ̆ng dhiăr bi êran pui, dưi mkra mjing hlăm brô 1 êklai 300 êklăk KWh grăp thŭn. Mbĭt hŏng bruă đru mguôp dŭm êtuh êklai prăk grăp thŭn kơ ngăn prăk alŭ wăl, mkăp brei thiăm pui kmlă kơ kluôm ala čar, hdră anei lŏ mâo êbeh 60 km êlan petông đru kơ mnuih ƀuôn sang hdĭp mda leh anăn mă bruă knuă. Đru rŭ mdơ̆ng 13 boh sang dhar kreh leh anăn sang klei khăp. Klei tŭ jing mơ̆ng dŭm hdră mkăp pui kmlă êran rŏng ai angĭn ti Ea H’leo jing mâo klei thâo kjăp, bruă klam prŏng, blŭ nao mbĭt hŏng bruă ngă, rơ̆ng bi kna bruă klam hŏng klei jăk kơ jih jang jing tal êlâo hĭn.