VOV4.Êđê- Mrâo êgao, ti kdriêk Mdrak, čar Dak Lak, kreh mâo klei truh ana kyâo êbuh hlăm êlan klei pui kmlă 22KV, ngă luič pui kmlă hlăm ênhă prŏng ti kdriêk Êa Kar lehanăn Mdrak. Hluê si anôk bruă pui kmlă alŭ wăl, hŏng êbeh 750 km êlan pui kmlă leh mtrŭn ti hnơ̆ng man dưn găn lu krĭng dliê pla, hlăm yan hjan angĭn êbŭ, klei ana kyâo huĭ srăng êbuh hlăm êlan pui kmlă kreh mâo snăk. Anôk bruă pui kmlă čang hmăng mnuih pla dliê brei hluê ngă, bi hgŭm kjăp hĭn čiăng rơ̆ng klei êđăp ênang êlan pui kmlă, răng mgang klei suaih pral lehanăn ngăn drăp mnuih ƀuôn sang:

Hlăm krah mlan 9, gŏ sang Vương Văn Hoàn, ti alŭ mrô 7, să Čư̆ San, nao awă druôm êbeh 4ha dliê ana Acasi (kyâo mtŭk). Ñu brei thâo kyua hlăm đang dliê anei mâo êlan klei pui kmlă, snăn êlâo kơ druôm kyâo, gŏ sang bi nao hưn hŏng phung ngă bruă pui kmlă ktrâo atăt hdră druôm kyâo čiăng bi êđăp ênang:

“Hlăm dliê knŏng pla kyâo jing ana acasi kyâo mktŭk đuič. Phŭn tal êlâo pla siă hŏng êlan klei pui kmlă. Leh kơ anăn hmư̆ mâo klei mtô mblang mơ̆ng êpul bruă pui kmlă snăn hmei dơ̆ng pŏk phai prŏng hĭn grông anôk êđăp ênang kơ êlan klei pui kmlă, čiăng bi mâo klei êđăp ênang mơh kơ găp djuê pô mă bruă”.

Grăp ha ana mtŭk brei prăk hrui wĭt kah knar 60-80 êklăk prăk, jing ênoh prăk duh mkra phŭn mơ̆ng mnuih ƀuôn sang Čư̆ San, kdriêk M’Drak

Tui si Thào Leo Lử, Khua alŭ mrô 7, ti să Čư̆ San, jing anôk krĭng taih kbưi hĭn êdi mkă hŏng kdriêk êbeh 50km, mâo ba yua leh pui kmlă jing sa klei mơak êdi hŏng phung ƀuôn sang. Kyuanăn, bruă đru răng kriê klei êđăp ênang kơ êlan pui kmlă găn hlăm dliê pô, ăt jing bruă klam mơ̆ng phung ƀuôn sang mơh:

“Mơ̆ng thŭn 2007 leh mâo dhiang ba pui kmlă mâo mkŏ anôk mđĭ mtrŭn pui truh hŏng krĭng ƀuôn sang, snăn hmei bŏ hŏng klei mơak, lač jăk kơ Đảng, knŭk kna lehanăn mơ̆ng anôk bruă pui kmlă. Klei hdĭp hmei kơ anei lu jing hdĭp hŏng bruă pla kyâo dliê. Hlăm yan hjan hlĭm angĭn êbŭ, hmăi ăt mâo nanao klei mtă brei mđing uêñ, kăp răng huĭdah anao kyâo êbuh lehanăn klah jăm hĕ hlăm êlan klei pui kmlă, ênưih ba klei jŭ jhat truh hŏng anak mnuih”.

Huĭdah ana mtŭk  joh êbuh hlăm ktuê êlan klei 22 KV ti Čư̆ San

Kluôm să Čư̆ San mâo 4800 gŏ êsei, lu jing djuê ana Mông lehanăn Dao hriê mơ̆ng dŭm čar nah Dưr čiăng mkŏ mkra klei hdĭp mda ala ƀuôn mrâo. Phạm Đăng Đảng, khua să Čư̆ San brei thâo, lăn ala jing prŏng ƀiădah dôk hlăm krĭng čư̆ čhiăng troh trôk, lăn huông duôr čư̆ kla, pla mnơ̆ng amâo lŏ jing ôh, kyuanăn knŏng hŏng pla dliê yơh jing guôp. Pla kyâo dliê amâo mâo suăi ôh bruă dlăng kriê, knŏng bi liê prăk blei mjeh kyâo đuič. Êdei kơ 4- 5 thŭn, kah knar ana kyâo anei mâo ba wĭt mơ̆ng 60 – 80 êklăk prăk/ha. Kyuanăn leh pla kyâo dliê, phung ƀuôn sang dưi yua jih klei găl mơ̆ng lăn anăn, tăp năng hlŏng pla êtak êbai hlăm grông lui huông kdrêč pioh kơ êlan klei pui kmlă.

“Hlăm wưng leh êgao snăn dhar bruă pui kmlă hŏng alŭ wăl mâo leh klei bi mguôp jăk hlăm bruă hâo hưn mtrŭt phung ƀuôn sang, ƀiădah ăt mâo mơh đa đa ka hlue gưt jăk ôh tui si anôk bruă pui kmlă mtrŭn. Tơdah ngă snăn, phung ƀuôn sang luič lăn măng ai. Bruă sang čư̆ êa bi mguôp leh hŏng anôk bruă pui kmlă lŏ mtrŭt mjhar phung ƀuôn sang čiăng kơ si srăng ngă čiăng dưi đru phung ƀuôn sang hdĭp lehanăn ba klei êđăp ênang mơh kơ êlan klei pui kmlă”.

Mnuih mă bruă pui kmlă msir mgaih klei kyâo joh êbuh hlăm êlan klei pui kmlă ti MDrak hruê 12-9

Nguyễn Công Hướng, K’iăng khua anôk bruă pui kmlă kdriêk Êa kar, brei thâo, tui si mta mtrŭn, dưi brei phung ƀuôn sang pla mnơ̆ng kbưi hŏng êlan klei pui kmlă hlăm brô 3m kơ dlông. Siămdah, ana kyâo pla anei srăng dlông truh êbeh 15m, anei mơh jing klei hyưt hŏng klei kyâo êbuh lehanăn klah tơdah tuôm hŏng hlĭm hjan angĭn êbŭ jăm hlăm êlăn klei pui kmlă, kyuanăn yơh pla bi kbưi hŏng êlan klei pui kmlă hlăm brô mơ̆ng 20m snăn kơh dưi mâo klei êđăp ênang. Ară anei anôk bruă pui kmlă kdriêk Êa Kar hlăk kiă kriê truh 750km êlan klei pui kmlă ti hnơ̆ng man dưn găn ti dua kdriêk Êa Kar lehanăn Mdrak, lu jing hlăm dŭm alŭ wăl čư̆ čhiăng, lu êdi hlăm čư̆ čhiăng lăn huông, hlăm yan hjan angĭn êbŭ, jing ênưih snăk tuôm hŏng klei kyâo klah êbuh jăm djŏ êlan klei pui kmlă.

Hrue 11/9, leh êgao, kyua hmăi mơ̆ng klei angĭn êbŭ mrô 5, angĭn ktang hjan prŏng truh kơ klei klưh hroh lăn, kyâo dliê êbuh lu jăm hlăm êlan klei pui kmlă 22Kv hlăk čuê 471F18 plah wah Êa Kar lehanăn Mdrak, ngă luič leh pui kmlă kơ 11 êbâo 600 gŏ êsei. Dŭm anôk mâo klei jhat rai êlan klei pui kmlă lu jing djŏ hlăm krĭng čư̆ čhiăng troh trôk, dleh dlan snăk hlăm bruă lŏ nao mkra wĭt. Kyuanăn, čiăng dưi mâo klei êđăp ênang kơ êlan klei pui kmlă hlăm yan hjan hlĭm, dhar bruă pui kmlă čiăng snăk mâo klei phung ƀuôn sang bi mguôp mbĭt:

“Kyuadah êlan klei pui kmlă găn hlăm lu krĭng čư̆ čhiăng troh trôk, jing klei dleh dlan snăk hŏng bruă kiă kriê êlan klei pui kmlă. Snăn hlăm wưng kơ anăp Anôk bruă pui kmlă Êa Kar lŏ dơ̆ng mâo lu hdră mă bruă mbĭt, lŏ dơ̆ng bi mguôp hŏng bruă sang čư̆ êa mâo klei hâo hưn, mtô mblang kơ phung ƀuôn sang čiăng kơ phung ƀuôn sang thâo săng lehanăn sa ai hŏng dhar bruă pui kmlă, hgŭm bi jăk hĭn hŏng anôk bruă pui kmlă čiăng dưi mâo grông êđăp ênang kơ êlan klei pui kmlă, lehanăn dưi ba yua pui hŏng klei jăk, boh nik hlăm yan hjan angĭn êbŭ”.

Pui kmlă jing yuôm bhăn snăk pioh kơ bruă mđĭ kyar klei hdĭp mda ala ƀuôn. Kyuanăn, phung ƀuôn sang năng yơh bi hlue gưt djăp ênŭm klei mtă đru bi răng kriê grông klei êđăp ênang kơ êlan klei pui kmlă, amâo mâo djŏ knŏng jing răng mgang kơ klei hdĭp phung ƀuôn sang, ƀiădah lŏ dơ̆ng đru krơ̆ng kơ pui kmlă jing jăk nanao mkăp djăp pui kơ klei hdĭp lehanăn duh mkra pla mjing./.

Pô mblang: Y-Khem Niê