VOV4.Êđê- Mơ̆ng knhal jih mlan 8 truh kơ ară anei, čar Dak Nông brei leh phung hđeh nao sang hră hriăm klă anăp. Bi mguôp kjăp hŏng dŭm êpul êya ngă bruă gang mkhư̆ klei ruă tưp Covid-19, knơ̆ng bruă mtô mjuăt hŏng klei mbruă dưi mlih leh dŭm klei hriăm djŏ guôp. Knơ̆ng bruă mtô mjuăt bi hriăm čar Dak Nông brei thâo, mơ̆ng knhal jih mlan 8 truh kơ ară anei, tui si boh sĭt klei ruă tưp hlăm grăp alŭ wăl srăng dưn yua dŭm hdră hriăm djŏ guôp êđăp ênang. Anăn jing klei bi mguôp hriăm online hŏng klei hriăm klă anăp, amâodah hriăm bi kmlah tui si hruê 1-3-5, 2-4-6 hlăm hruê kăm.

Knơ̆ng dŭm anôk kwang dar ngă klei hriăm online. Êjai mkŏ mjing klei hriăm klă anăp, čar Dak Nông ngă leh klei ksiêm mkă hrŏng hlăm dŭm sang hră mâo hđeh mơ̆ng lu anôk. Kyua dưn yua hdră êlan anei, hruê pŏk kčưm thŭn hriăm mrâo 5/9, dưi hmâo ƀuh hđeh sang hră mâo klei ruă tưp Covid-19 leh anăn ngă bruă tui duah êpul êya mâo klei ruă tưp čiăng mkhư̆ hĕ klei ruă. Ară anei, čiăng hdĭp êđăp ênang, hŏng klei mbruă leh anăn ksiêm dlăng mâo boh tŭ dưn klei ruă tưp Covid-19, čar Dak Nông dôk bi hmar bruă tlŏ mgang vaccine, ngă bruă hâo hưn čiăng mnuih ƀuôn sang mâo klei thâo săng hĭn hlăm bruă gang mkhư̆ klei ruă tưp.

Pô mblang: Y-Ƀel Êban