VOV4.Êđê - Êpul hgŭm kriê dlăng quốc tế Hdră bruă Anak mnuih lehanăn wăl mnơ̆ng dhơ̆ng hdĭp UNESCO mrâo mkŏ mjing Klei bi kƀĭn hluê hdră online ti Nigiera, hluê ngă leh hdră mplĕ hră hluê hŏng klei bi mklă dŭm mta hră m’ar mơ̆ng wăl anôk lăn adiê êwa angĭn tar rŏng lăn. Hlăm anăn, Việt Nam mâo 2 wăl anôk lăn adiê êwa angĭn dưi mplĕ hră hlăm gưl anei jing Wăl mnơ̆ng dhơ̆ng hdĭp ti dlông čư̆ Kon Hà Nừng (čar Gia Lai) lehanăn wăl mnơ̆ng dhơ̆ng hdĭp jing Čư̆ Chúa (čar Ninh Thuận). Nao lehanăn blŭ hrăm ti anôk bi kƀĭn, K’iăng khua anôk bruă sang čư̆ êa čar Gia Lai Kpă Thuyên brei thâo: Leh dưi tŭ yap, Anôk bruă sang čư̆ êa čar Gia Lai ƀuăn hluê ngă kjăp klei kčah mtrŭn mơ̆ng UNESCO kñăm rơ̆ng kjăp dŭm hnơ̆ng čuăn lehanăn bruă klăm mơ̆ng sa wăl mnơ̆ng dhơ̆ng hdĭp, mjing Wăl anôk hdĭp jăk kơ mnơ̆ng dhơ̆ng ti dlông čư̆ Kon Hà Nừng jing gru hmô mđĭ kyar bruă duh mkra – ala ƀuôn h’ĭt kjăp mơ̆ng alŭ wăl, bi hgŭm krơ̆ng kjăp klei lu jơr mnơ̆ng dhơ̆ng lehanăn kriê kjăp knhuah dhar kreh mơ̆ng djuê ana; mđĭ kyar bruă duh mkra mguôp hŏng răng mgang wăl hdĭp mda, ba yua djŏ guôp mnơ̆ng dhơ̆ng čŏng mâo, mđĭ hnơ̆ng tŭ jăk klei hdĭp, hdră mjuăt bi hriăm lehanăn ksiêm hriăm bruă kreh knhâo./.

H’Nêč pô mblang