VOV4.Êđê- Ăt hlăm hdră ngă bruă ti Mi, Khua lăn čar Nguyễn Xuân Phúc mâo leh hră mơĭt kơ Klei bi kƀĭn gưl dlông mơ̆ng Êpul hgŭm lu ala čar  kơ bruă mnơ̆ng ƀơ̆ng huă kyua Khua gĭt gai Êpul hgŭm lu ala čar Antonio Guteres gĭt gai. Khua lăn čar Nguyễn Xuana Phúc kčĕ dŭm hdră msir rơ̆ng djăp mnơ̆ng ƀơ̆ng huă ti anăp klei bi mlih yan adiê leh anăn klei ruă tưp Covid-19 leh anăn brei thâo, Việt Nam čiăng jing anôk mâo klei mĭn mbruă kơ mnơ̆ng ƀơ̆ng huă ti krĭng wăl. Khua lăn čar Nguyễn Xuân Phúc lač klă, klei bi hgŭm plah wah dŭm ala čar, dŭm ƀĭng hgŭm hlăm bruă mkăp mnơ̆ng ƀơ̆ng huă brei ngă kyua klei tŭ mơ̆ng mnuih ƀuôn sang. Ti Việt Nam, rơ̆ng djăp mnơ̆ng ƀơ̆ng huă jing tur knơ̆ng msir klei ư̆ êpa, bi hrŏ klei ƀun knap, mđĭ klei hdĭp mnuih ƀuôn sang leh anăn jing klei găl čiăng mđĭ kyar bruă lŏ hma Việt Nam klă mngač, đua klam, hơĭt kjăp. Čiăng mđĭ kyar bruă mnơ̆ng ƀơ̆ng huă, Khua lăn čar Nguyễn Xuân Phúc lač, brei pŏk mlar klei bi hgŭm lu ala čar hlăm bruă ksiêm hriăm, đaŏ knăl, mkŏ mjing klei hâo hưn klei amâo jăk kyua yan adiê, klei ruă tưp, kriê dlăng hơĭt kjăp ngăn dŏ ala čar, lu jơr mnơ̆ng hdĭp leh anăn dliê, kriê dlăng phŭn êa hluh knông lăn, êa ksĭ.

Pô mblang: H’Zawut Ƀuôn Yă