VOV4.Êđê - Ti anôk bruă knŭk kna, k’iăng khua knŭk kna Phạm Bình Minh nao hgŭm leh klei kƀĭn trông gưl dlông bruă mnia mblei leh anăn duh bi liê ASEAN (ASEAN BIS) thŭn 2021 hŏng akŏ “Rŭ mdơ̆ng bruă mkŏ mkra mrô kjăp hlăm alŭ wăl ASEAN” dưi mkŏ mjing hŏng êlan online. Blŭ hlăm klei kƀĭn trông anăn, k’iăng khua knŭk kna Phạm Bình Minh mñă klă: Dưi ngă bruă ksiêm ksiêm dlăng leh anăn krŭ wĭt bruă duh mkra amâo djŏ knŏng knang mă kơ klei gĭr sa knŭk kna amâodah sa ala čar hjăn păn, ƀiădah čiăng klei bi gĭr, hrăm mbĭt mơ̆ng 10 ala čar hlăm ASEAN ăt msĕ hŏng phung mah jiăng, ƀĭng hgŭm. ASEAN čiăng lŏ tui ngă dŭm klei kčĕ dưi bi klă leh hŏng 3 hdră tă: Kơrŭ wĭt, mlih mrô leh anăn klei kjăp, dưn yua klei kreh knhâo mrâo mrang, kdrăp mrâo mrang mtrŭt mđĭ klei mgaih msir mtah. Čiăng tă hdră kơ dŭm mta kñăm anei, K’iăng khua knŭk kna lŏ sa blư̆ mñă klă klei yuôm bhăn mơ̆ng hdră kluôm ASEAN kơ ruă kơrŭ kdơ̆ng bruă tuh tia gưl tla 4 leh anăn bruă bi hmar mđĭ ai dưi mơ̆ng ASEAN, bi mdrơ̆ng hŏng dŭm klei truh yan adiê ala čar Brunei kcĕ leh thŭn anei.

Y Ƀel pô mblang