Do là jơnau yal geh đơs tàm Pơrjum sền sơ wì ală bơta lơh jat 6 nhai bồ nam, kơnòl broă, broă lơh tờm 6 nhai lồi nam 2023 gah cau lơh broă, cau geh màng mờ dà lơgar mờ mpồl bơtiàn bơh Ƀộ Lao động - Thương ƀiñ mờ Xã hội bơyai lơh tàm mho ngai 21/07, tàm ƀòn dờng Huế, càr Thừa Thiên Huế.

6 nhai bồ nam do, drà cau lơh broă sền bal kơ̆ kơl jap, ală sơñio khà drà cau lơh broă gơguh dimơ. Cau lơh broă geh broă lơh là 51 tơlak 2 rơbô nă cau, gơguh rlau 900 rơbô nă cau pơndrờm bal dùl tŭ mờ nam lài. Jơh gah lơh broă tơrgùm lơh sir broă lơh, adat boh lam bè broă lơh sền gàr dong kờl mpồl bơtiàn; lơh jat broă lơh dong kờl priă jền mpồl bơtiàn pah nhai ai rlau 3 tơlak 300 rơbô nă cau sền gàr dong kờl mpồl bơtiàn mờ rlau 300 rơbô hìu bơnhă, cau dùl nă să dờp dong kờl, ròng siam pah nhai. Tàm pơrjum, ala mat ală mpồl lơh broă, ală tiah cribơyai, ai tơlik ală gùng dà broă lơh jat sền bơta gơlik geh bơta cau lơh broă, broă lơh, ală broă sền gàr lơngap lơngai mpồl bơtiàn; pơn jat tai lơh ală broă lơh rề ơnàng làm uă mờ bơtàu tơnguh cau blơi Bảo hiểm Y tế, Bảo hiểm ờ geh broă lơh.