Tàm dơ̆ pơrjum, ală kwang bàng tàm Ủy ƀan Dà lơgar bè cau dờng sơnam geh jơnau dan: Cíñ phủ đơng lam ală anih lơh broă bơ̆t bơtàu “Gùng dà broă lơh Dà lơgar ai cau dờng sơnam in tàm bơta pa” nàng di tŭ sơndră mờ bơta tơngŏ kra khà kờp làng bol lơgar Việt Nam; bơsong jơh 5% khà cau dờng sơnam, tàm pơgăp 500 rơbô nă cau ờ hềt geh sră ƀảo hiểm y tế, nàng 100% cau dờng sơnam geh sră ƀảo hiểm y tế; geh broă dong kờl lơh Anih ơm rơlô să cau dờng sơnam in nàng hòi jà geh bơta tă pơgồp bơh mpồl bơtiàn.

Mờ tơnguh bơtàu broă lơh phan bơna, broă lơh drơng ala sền gàr bơta pràn kơl dang să jan cau dờng sơnam in, hòi jà tiah mpồl cau dùl nă să lơh is tus bal tàm broă ai broă lơh drơng ala cau dờng sơnam in. Phó Thủ tướng ồng Trần Hồng Hà đơs tờm: Broă drơng gàr, tơnguh gơnoar bơh cau dờng sơnam tŭ do pal geh sền tàm bơta lơgar Việt Nam neh mŭt tàm tơngai kra khà kờp làng bol. Nam 2023 pal sền kwơ rơlao, ai tơl bơta niam nàng cau dờng sơnam geh tă pơgồp ai mpồl bơtiàn in.