Kơnhoàl Trường Sa, càr Khánh Hòa gam hời rơ hời lơh jat kơnòl broă geh Nghị quyết sồ 09/2022 bơh Bộ Cíñ trị dê lơh nền là bơt bơtàu kơnhoàl Trường Sa gơ gơs Anih tờm lơh sa, niam chài, mpồl bơtiàn tàm dà lềng bơh gùt lơgar dê, là anih kơ̆ kơl jap sền gàr gơnoar tờm tàm dà lềng, bồt bơlào dà lềng bơh Dà lơgar dê.

Ơdŭ bơsram tàm Hìu bơsram kấp dùl xã Song Tử Tây, kơnhoàl bồt Trường Sa là ơdŭ bơsram tàm bơrlŭ bal, geh 6 nă kơnòm bơsram, tàm pà gơs 2 mpồl gơwèt 2 khối ơdŭ. Bàr pe nam do, gam kal ke mơya broă lơh bơto bơtê kơnhoàl Trường Sa neh lơh jat di mờ broă rơndap lơh, 100% kơnòm bơsram kấp dùl ndrờm lơh geh jơnau kờñ bè ală bơta pràn jak mờ nùs nhơm niam. Gùt kơnhoàl geh 3 hìu bơsram kấp dùl, mpồl cau pơgru geh sac rơ wah, ntrờn neh dong tơnguh uă bơta niam bơto bơtê mờ bơsram. Klau pơgru Nguyễn Hữu Phú, pơgru Hìu bơsram kấp dùl Song Tử Tây, kơnhoàl Trường Sa pà gĭt: “Broă lơh ơdŭ tàm bơrlŭ bal tàm cơldŭ geh uă bơta gĭt wă krơi is, bơto bơtê mờ bơsram kung kal ke, bòl glar rlau mờ broă he mìng bơtê tàm hờ đang ù gờl. Ơm tàm bồt ngài mờ hìu bơnhă, kah hìu bơnhă kung uă ngan sơl, tài bơh ală bơta tàm dà lềng, bồt bơlào dà lềng tàm do. He mìng tă pơgồp dà kơl hề dùl bơnah bơh he dê ai dà lơgar in. Oh mi, cau ling, làng bol tàm do kung sền gròi uă ngan”.

Tam gơl dờng ngan rlau jơh bơh kơnhoàl Trường Sa dê tàm ală nam pa do là ală phan bơna, phan bơt bơtàu. Bơdìh mờ 3 nơm hìu bơsram, tàm ală bồt neh geh 10 nơm hìu sơnơm, 9 nơm hìu Yàng Phờk, 2 nơm hìu bơhiàn yau, 1 rơbàng anih ơhò ơm, 1 nơm ƀlàng rơndeh par, 2 ƀòn lơh ka... 100% hìu ơm bơh làng bol dê geh lơh kơ̆ kơl jap, dờng niam; jơnau tàm yal tơngĭt bal, ală gùng lòt rê, gùng bê tông, sơntèk dơng dà bè ờs geh lơh tơl làm. Ngan là, ală năng lượng sàng goh bơh đèng càl, đèng mat tơngai geh bơcri priă lơh lơh tam gơl uă ngan muh mat, rài kis làng bol tàm ală bồt bơlào dà lềng dê, sơlơ tơnguh broă gàr niam lơngap lơngai Dà lơgar. Trung tá Trần Danh Hoàng, Đảo trưởng Bồt Sinh Tồn pà gĭt: “Ală năng lượng sàng goh geh bơcri priă lơh, bơtàu tơnguh cồng nha ngan, tơrmù uă broă ngui măy nổ, ờ hoàn gơrềng bơta ơniam tàm tiah ơm kis kung bè broă lơh bơh mpồl ling dê. Dong làng bol, kwang bàng, cau ling tàm bồt gàr niam geh dùl bơnah kwơ màng ngan, gàr niam rài kis làng bol, rcang lài tam lơh bơh bồt dê”.

Ală hìu bơnhă làng bol kis tàm ală bồt geh gơnoar atbồ tiah do bơto pơlam, dong kờl, lơh geh ală bơta bơtàu tơnguh lơh sa, ròng phan mờ sơng ka sền gàr phan tam, lơh ka di pal mờ tiah ơm kis tàm bồt bơlào dà lềng dê. Tơl hìu bơnhă ơm kis tàm dùl nơm hìu ơm ơnàng 70 thơk vuông mòn lơh niam, kơ̆ kơl jap, geh tơl cơldŭ wă năc, 2 cơldŭ bĭc, hìu bềp mờ ală phan bơna drơng ngui tàm rài kis bè cơnờng, tùh, tivi...  Bi Nguyễn Thị Lan, làng bol tàm xã Song Tử Tây, kơnhoàl Trường Sa, càr Khánh Hòa pà gĭt: Tŭ do tàm kơnhoàl bồt geh tơl hìu bơsram, hìu niam chài, geh sền gròi pràn kơl dang să jan, broă kwơ dong kờl mpồl bơtiàn geh gàr niam, dong làng bol iang nùs ơm kis tàm dà lềng, tàm bồt bơlào dà lềng dê. Bi Nguyễn Thị Lan, đơs: “Bol añ sền gŏ rài kis ring lơngai, he pơnđơl pràn lơh ngan bơtàu tơnguh lơh sa, lơh ka rềp, drơng rài kis. Ưn ngài bơta sền gròi, pơndờm pơnđiang bơh ală anih lơh broă, mpồl cau tềng hơđang ù gờl neh pơndờm pơnđiang, tam pà bal nàng rài kis bal añ tàm bồt bơlào dà lềng tơl làm rlau”.

Kơnhoàl bồt Trường Sa, càr Khánh Hòa tŭ do neh geh bơcri priă lơh 4 tiah anih ơhò ơm, tàm:  Song Tử Tây, Đá Tây, Trường Sa, Sinh Tồn bal mờ ală Anih tờm drơng broă lơh ka. 5 nam do, Pôs đồng ling sền gàr tiah nhàr lơgar Trường Sa neh dờp mờr 390 dơ̆ rơndeh rơndồ măi mok mờ mờr 6 rơbô nă cau lơh broă mut ơm pleh tàm anih ơhò ơm bơh ală bồt dê, mờ rlau 440 nă cau măi plung geh sơm sồt tài bơh rềs àr lơh broă tàm dà lềng. Ồng Nguyễn Đức Toàn, cau lơh ka tàm tiah lơh ka Trường Sa pà gĭt, ală anih ơhò ơm geh lơh dùl ròt bal, ai ală broă drơng broă tàm dà lềng, drơng broă măi mok, dong cau lơh ka iang nùs lơh ka tàm dà lềng jŏ ngai, tơrmù priă tă uă ngan tàm tơl dơ̆ lòt lơh ka tàm dà lềng. Ồng Nguyễn Đức Toàn, đơs: “Ơhò tờm añ dê gơtìp chơ̆t măi, ngài mờ bồt dà lềng gĭt nđờ hải lý mơya tềng đap mat he hòi điện kấp kứu, dong kờl rềs àr bơh hơ đang ù gờl. Hờ đăng ù gờl geh jơnau yal tus tàm bồt, kơnờm bồt, ơhò bơh bồt dê tus hoài dŭi mut nàng bơsong. Ală cau gơtìp bè hơ̆ geh uă ngan”.

Pơn jat tai lam lơh bơt bơtàu ală broă lơh cíñ trị mờ lam lơh rài kis làng bol ơm kis tàm ală xã, thị trấn gơwèt kơnhoàl Trường Sa là dùl tàm ală jơnau sồr nàng bơtàu tơnguh tơl làm càr Khánh Hòa dê. Lam lơh jat Nghị quyết sồ 09 /2022 bơh Ƀộ Cíñ trị dê bè bơt bơtàu, bơtàu tơnguh càr Khánh Hòa tus nam 2030, rơndap broă lơh tus nam 2045, kơnhoàl bồt Trường Sa tơrgùm bơcri priă lơh ală năng lượng, ală măi jồr dà bè ờs lơh broă dờng pơgồp bal mờ bơt bơtàu phan bơna ală tiah drơng broă lơh ka in. Bơh hơ̆, lơh geh bơnàng jă ai làng bol tàm tiah do in lơh ka tàm dà lềng, bơtàu tơnguh lơh sa. Mơkung gơ hòi gơ jà ală mpồl ơhò lơh ka lòt lơh ka tàm tiah ngài bơh ală càr jat kềng gah dà lềng tàm gùl lơgar tus mờ Trường Sa. Càr Khánh Hòa pơgồp bal mờ Bộ Nông nghiệp mờ Phát triển Nông thôn mờ ală anih lơh broă, mpồl lơh broă geh gơrềng mut ngui mờ lơh jat broă lơh dong kờl làng bol lơh ka ơm kis, lơh broă mờ lam lơh ka tàm ƀòn lơh ka gơwèt ală xã bồt dê. Ồng Lê Đình Hải, Củ tịc Ủy ƀan Ñân zân kơnhoàl Trường Sa càr Khánh Hòa pà gĭt, kơnhoàl Trường Sa ai bơt bơtàu Cíñ trị lơh bơnàng jă nàng bơtàu tơnguh bơta niam tơrgùm bal, mơkung ai jơh bơta pràn nàng bơtàu tơnguh lơh sa, niam chài, mpồl bơtiàn, gàr niam rài kis làng bol, rcang sơndră trồ tiah lơh aniai mờ dong kờl rềs àr.

Ồng Lê Đình Hải, đơs:“Ling klàng mờ làng bol kơnhoàl Trường Sa gĭt nền pơlam tàp nùs nhơm jơh nùs lơh ngan, gàr kơ̆ bơta pin dờn bal mờ gùt lơgar tàm gùng lòt lik tàm dà lềng dờng. Dipal mờ bơta pin dờn kờñ gơboh bơh Đảng mờ làng bol gùt lơgar dê. Ngan là, ling klàng mờ làng bol kơnhoàl Trường Sa jơh nùs lơh ngan bơsram mờ lơh jat cồng nha Nghị quyết sồ 09 bơh Ƀộ Cíñ trị dê, tàm hơ̆, tơrgùm pơgồp bal niam bơtàu tơnguh lơh sa, mpồl bơtiàn, sền gàr Dà lơgar- sền gàr lơngap lơngai. Lơh pràn bơt bơtàu mờ bơtàu tơnguh kơnhoàl Trường Sa gơ gơs Anih tờm lơh sa, niam chài, mpồl bơtiàn tàm dà lềng bơh gùt lơgar dê, là anih kơ̆ kơljap sền gàr gơnoar tờm dà lềng, bồt bơlào dà lềng bơh Dà lơgar dê”.