Mờ bơta wèt sền tus nam 2030 (hòi lơyah là Rơndăp broă lơh sồ 06) bơh Cíñ phủ dê geh gơtha dờng màng ngan tàm broă tàm tơrbŏ yal tơngĭt jơnau, ngui drơng geh cồng nha ală kơnòl broă lơh sa- mpồl bơtiàn, wèt tus jơnau kờñ làng bol mìng yal tơngĭt jơnau dùl dơ̆ mờ anih lơh broă Dà lơgar tàm tŭ lơh ală sră nggal gơnoar ătbồ dà lơgar dê. Den tàng bè hơ̆, tơngai lài, càr Dăk Lăk neh tơnguh tai bơta đơng lam bơh Đảng dê, tàm broă lơh pràn lơh jăt Rơndăp broă lơh sồ 06 bơh Cíñ phủ dê bơh hơ̆ lơh geh bơta ring bal dùl ròt, geh cồng nha tàm ală tŭ lơh.

Ồng Huỳnh Văn Ánh ơm tàm xã Phú Lộc, kơnhoàl Krông Năng, càr Dăk Lăk gơlơh niam nùs ngan tŭ lơh sră nggal dà lơgar geh lơh tơn tàm internet tàm anih lơh broă dùl mpồng bơh xã dê dùl bă ƀươn ƀoài. Ờ mìng pơyua sră nggal tàm ală anih drơng broă dà lơgar geh lơh tơn tàm internet mờ ồng Huỳnh Văn Ánh gam rwah broă lơh tơm priă lơh sră pơ àr bơh ală ngân hàng điện tử. Ồng Huỳnh Văn Ánh, pà gĭt: He ờ duh pal lòt lơh sră pơ àr lơh sră ƀảo hiểm halà ờ duh pal lơh sră nggal dan mà sồ gĭt nền mat tàm Kwang àng. Khi sồr ngai lơi là he tus he ai ală cồng nha 1 tàm 3 bơta dùl dơ̆. Ai priă tơm den kung bè hơ̆ sơl, he geh mã sồ he pờ halà pơyua ai đah do in ƀươn ƀoài ngan mờ mhar ngan.

Ai gơwèt mờ ồng Nguyễn Ngọc Anh ơm tàm xã Hoà An, kơnhoàl Krông Pach, càr Dăk Lăk tơnơ̆ tŭ geh ală oh mi tàm mpồl Rơndăp broă lơh sồ 06 bơh xã dê mblàng yal, ồng gŏ geh bơta kwơ tŭ ngui mat gĭt nền mat điện tử, bè: tềm pềr geh tŭ jiơ, priă tă lơh tài bơh ờ duh pal cih yal uă bơta pơlam lơh, tơrmù broă lơh sră nggal tŭ lơh ală broă lơh sră pơ àr gơnoar ătbồ dà lơgar dê, gơtùi ala sră kăn kươk làng bol mờ ală bơta sră pơ àr tŭ yal tơngĭt jơnau tàm tơrbŏ bal mpờl tàm phan ngui gĭt nền mat điện tử dà lơgar, bè; sră ai gơnoar măy rơndeh, ƀảo hiểm y tế…Ồng Nguyễn Ngọc Anh neh ờ gŏ kơlôi mờ lơh tơn: Tam gơl sồ, crăp ơn gĭt nền măt điện tử do là gơnoar kwơ uă ngan ai làng bol in den tàng geh ală mpồl bơh xã dê, kơnhoàl dê sền gròi tus tơl hìu bơnhă dong kờl làng bol bol añ in gĭt wă bè lơi là crăp ơn mã gĭt nền măt điện tử gơ là ƀươn ngan cèng wơl bơta kwơ ai làng bol in tàm tŭ lơh broă kung bè lơh broă tàm internet den tàng làng bol bol añ chờ hờp ngan.

Rơndăp broă lơh sồ 06 bơh Cíñ phủ dê geh gơnoar broă mờ bơta gơrềng uă, pơgồp bơnah tơnguh uă cồng nha ătbồ dà lơgar tàm uă gah broă. Mờ gơnoar broă mpồl cau tờm tàm broă lơh jăt Rơndăp broă lơh sồ 06, tơngai lài, mpồl kwang àng càr Dăk Lăk neh lơh ngan tàm tŭ lam lơh jăt, lam lơh dờp lơh sră nggal gơnoar ătbồ dà lơgar dê, hòi jà, bơto pơlam làng bol lơh sră nggal lơh sră kăn kươk làng bol, sơlơ tơnguh tai ală broă lơh nàng lơh sir jơh ală broă jàu lơh loh làng jơnau yal tơngĭt jơnau. Trung tá ồng Trần Văn Dũng, Kwang àng xã Hoà An, kơnhoàl Krông Păch, càr Dăk Lăk, pà gĭt: Kwang àng xã pơgồp bal mờ ală gah mpồl lơh broă lòt tus ală thôn ƀòn lơh crăp tơmŭt gĭt nền măt điện tử khà dùl ai làng bol in mơkung pơgồp bal mờ mpồl ătbồ sră nggal gơnoar ătbồ dà lơgar dê lơh tơmŭt ơn gĭt nền măt điện tử khà bàr. Bơh ală tŭ lơh den làng bol kờñ ngan bè crăp tơmŭt gĭt nền măt điện tử gơwèt mờ làng bol.

Nàng tơnguh uă gơnoar broă, kơnòl broă bơh kâp ủy đảng ală kâp dê tàm tŭ lam lơh Rơndăp broă lơh sồ 06, ngai 20/03/2023, Mpồl sùm lơh kơnòl broă Tỉñ ủy càr Dăk Lăk geh Cỉ thị sồ 33 bè tơnguh tai bơta đơng lam bơh ală kâp ủy đảng dê tàm tŭ lơh pràn lam lơh Rơndăp broă lơh lơh uă phan ngui jơnau yal tơngĭt jơnau làng bol ơm kis, gĭt nền măt mờ kĭ măt điện tử drơng tam gơl sồ dà lơgar tơngai bơh nam 2022- 2025, broă rơndăp lơh tus nam 2030 tàm ù tiah càr Dăk Lăk dê. Bơh Cỉ thị do, Ủy ƀan Ñân zân càr Dăk Lăk geh uă broă rơndăp lơh nàng lam lơh Rơndăp broă lơh. Mơkung neh sồr ală sở, gah lơh broă mờ ală tiah lơh mờr 2 rbô 400 mpồl lơh broă lam lơh Rơndăp broă lơh sồ 06 bơh càr tus ală thôn, ƀòn, mpồl làng bol tiah drà. Tus tŭ do, càr Dăk Lăk neh jơh lơh sir cih yal tàm 2 tơlak 100 rbô jơnau yal tơngĭt jơnau làng bol dê tàm ală anih ơn prăp jơnau yal tơngĭt jơnau dà lơgar bè làng bol ơm kis, gàr mờ ngui geh cồng nha drơng broă dà lơgar bè ătbồ lơngăp lơngai rơndăp tăp sèng tàm ƀòn lơgar. Bal mờ hơ̆, neh lơh rlau 1 tơlak 600 rbô sră kăn kươk làng bol crăp cĭp điện tử ai làng bol in, dờp rlau 500 rbô măt gĭt nền măt điện tử tàm khà dùl, khà bàr. Ală anih lơh sră nggal gơnoar ătbồ dà lơgar bơh càr dê kung neh geh tàm tơrbŏ mờ ală anih ơn prăp jơnau yal tơngĭt jơnau dà lơgar bè làng bol ơm kis, lam lơh drơng broă dà lơgar geh lơh tơn tàm internet tàm khà 3, khà 4 geh sền gròi lơh pràn, ngan là 25 drơng broă dà lơgar kwơmàng kờñ pal geh gơwèt Rơndăp broă lơh sồ 06 pơgồp bơnah tơnguh uă jơnau gơtùi lơh jăt ngan ngồn tàm rài kis mờ lơh geh cồng nha ătbồ sră pơ àr gơnoar ătbồ drơng broă làng bol in. Thiếu tướng ồng Lê Vinh Quy, Kwang ătbồ Kwang àng càr Dăk Lăk mơkung là Phó Kwang ătbồ duh broă sùm Mpồl lơh broă Rơndăp broă lơh sồ 06 càr Dăk Lăk dê, pà gĭt: Do là rơndăp broă lơh bơh Cíñ phủ dê, broă lam lơh jăt pal geh bơta lơh bal bơh ală kâp, ală gah dê mờ bơta dùl nùs bal bơh jơh gùt làng bol dê. Tàm hơ̆, mpồl kwang àng là mpồl cau tờm, là mpồl duh broă sùm, tơn jơh bồ tơngoh kơlôi sơnơng ờ hềt dipal, ờ hềt ring bal jơnau yal tơngĭt jơnau. Jơh ală pal kơlôi tus bơta kwơ bal là ai tơl bơta ƀươn ngan rlau jơh ai làng bol mờ mpồl lơh sa kă bro in. Dơ̆ 2 là jơh nùs mblàng yal nàng làng bol mờ mpồl lơh sa kă bro in gŏ geh bơta kwơ bơh Rơndăp broă lơh sồ 06 dê rơhời lơh gơs bơta niam chài làng bol sồ, mpồl bơtiàn sồ.

Mờ bơta sồr lơh bơh kâp ủy đảng dê, bơta kràñ cê jơh nùs tàm tŭ lơh jăt bơh ală kâp gơnoar ătbồ dê, ală cồng nha bơh sơnrờp tàm broă lam lơh jăt Rơndăp broă lơh sồ 06 tàm càr Dăk Lăk neh lơh geh cơng tàng adat boh lam ai broă sơlơ tơnguh tai cồng nha lơh broă dà lơgar geh lơh tơn tàm internet. Bơh hơ̆ pơgồp bơnah tơnguh uă cồng nha ătbồ dà lơgar ai tơl ală bơta ƀươn ai làng bol mờ mpồl lơh sa kă bro in tàm tŭ bơtàu tơnguh lơh sa- mpồl bơtiàn drơng broă lơh tam gơl sồ dà lơgar.