Tŭ do, càr Dăk Lăk geh rlau 1 rbô 60 nă cau geh bơngă pin dờn geh pơn rơ jak, gơ wèt 49 jơi bơtiàn ơm kis tàm càr. Khi là ală cau lơh krơh lài, wă wờng bè bơhiàn bơh yau, git bơta kơp kờñ bơh làng bol dê, là anih kơldìng nùs nhơm bơh ală ƀòn lơgar dê; là rơbàng tơrbŏ đah làng bol mờ gơnoar atbồ, jơh nùs tus bal bơtàu tơnguh lơh sa – mpồl bơtiàn, sền gàr lơngăp lơngai rơndap tap sèng, dră wơl kai bơh ală bol sò tơm, bol pơrlơ̆ dră dê, pơgồp bơnah gàr kơ̆ lơngap lơngai cíñ trị tàm ƀòn lơgar.

Tàm dơ̆ tìp mat, ală cau ala mat neh tam pà mờng chài tàm broă lơh hòi jà làng bol, tơrña gơ rờm bal, bơt bơtàu ƀòn lơgar pa, hòi jà ơruh pơnu lòt ling. Ồng Y Tum Ayun, cau geh bơngă pin dờn tàm ƀòn Ea Tuk, sàh Cư Pơng đơs là, bơta ring bal dồ nùs tàm làng bol là bơnàng jă kơ̆ kơljap ngan nàng bơt bơtàu ƀòn lơgar hờm ram, gơboh gơbài. Den tàng, tơl nă cau pal lơh ngan tam klac bal, pơgồp bal bơta pràn bơt bơtàu ƀòn lơgar:

“Pơn jat tai bal mờ Đảng, gơnoar atbồ ƀòn lơgar bơt bơtàu ƀòn lơgar tàm broă bơtàu tơnguh lơh sa, gàr kơ̆ lơngăp lơngai cíñ trị, rơndap tap sèng ring lơngai mpồl bơtiàn tàm ƀòn lơgar, mblàng yal, bơto bơtê làng bol bè ală jơnau yal tơnggit pa, dipal, hòi jà làng bol lơh sa, sền gròi kòn sau lòt bơsram, jơh nùs brồ guh tơn jơh gloh tơrmù rƀah”.

Ală cau ala mat kung cribơyai, tam pà bal broă lơh tàm broă tơnguh nùs nhơm rơcang ngac, dră wơl, kơryan kai lơh aniai bơh ală mpồl sò tơm dê, sơlơ tơnguh tai bơta tam klac đềt mềr ling klàng làng bol.

Đơs tàm dơ̆ tìp mat, Đại tá Niê Ta, Lam bồ Gah đơng lam Ling klàng càr Dăk Lăk ưn ngài ală tă pơgồp dờng màng, kuơmàng bơh ală cau kra ƀòn, cau atbồ ƀòn, cau geh bơngă pin dờn dê gơ wèt mờ kơnòl broă ling klàng, sền gàr dà lơgar bơh càr dê. Mờ kung sồr cau geh bơngă pin dờn pơn jat tai pơgồp bơnĕ bơnài đah adat boh lam mờ adat bơhiàn, chài rơgơi mblàng yal, hòi jà làng bol:

“Git loh gùng dà, jơnau lơh nền, broă lơh bơh Đảng, adat boh lam bơh Dà lơgar dê, pơgồp bal bơnĕ bơnài đah adat boh lam mờ adat bơhiàn nàng mblàng yal, hòi jà làng bol kis mờ lơh broă jat sơnua boh lam, adat boh lam. Mblàng yal, bơto bơtê, hòi jà làng bol ală jơi bơtiàn bañ iat, bañ đòm ală jơnau đơs blac pơrlồm, mblàng yal ờ ngan bơh ală mpồl sò tơm dê lơh aniai tus lơngăp lơngai dà lơgar, gơnoar tờm kơnhoàl ù tiah dà lơgar dê”.

Di dơ̆ do, Gah đơng lam ling klàng càr Dăk Lăk neh pà sră jờng rơ 30 nă cau geh cồng nha pơn rơ ngan tàm broă lam lơh kơnòl broă sền gàr dà lơgar, ling klàng tàm càr nam 2025, pơgồp bơnah bơt bơtàu rài sền gàr dà lơgar jơh gùt làng bol.